DDoS-напад на платформу для галасавання на выбарах у КР адбіты
25 траўня, Позірк. Масіраваны DDoS-напад на платформу для галасавання на выбарах у Каардынацыйную раду (КР) адбіты, вынікае з відэапаведамлення, распаўсюджанага старшынёй выбарчай камісіі КР Аленай Прыходзька ўначы 25 траўня, праз некалькі гадзін пасля абвяшчэння пра знешнюю спробу парушыць працу сістэмы.
Прыходзька заявіла, што платформа сутыкнулася з паступленнем каля 18 млн запытаў. Тое, што адбылося, яна папрасіла пракаментаваць кіраўніка IT-платформы “Новая Беларусь” Паўла Лібера, каманда якога распрацавала інфраструктуру для верыфікацыі выбаршчыкаў і анлайн-галасавання Belarus ID.
“Нічога страшнага не адбылося, — сказаў ён. — Адбыўся дастаткова моцны аднамомантавы DDoS-напад на старце. У прынцыпе мы праз гэта крыху падкарэктавалі тое, як мы запускаем галасаванне, каб быць упэўненымі, што паспяхова запусціцца пад нагрузкай. Таму запусцілі крыху пазней. Ці будзе галасаванне заканчвацца пазней, думаю, гэта ўжо будзе вырашаць ЦВК (выбаркам КР. — “Позірк”.)”.
На момант запісу паведамлення, паводле інфармацыі Прыходзька, было выдадзена 750 ідэнтыфікатараў выбаршчыкаў.
Выбары ў КР пачаліся апоўначы 25 траўня і, згодна з першапачатковым планам, мусяць завяршыцца ў 23:59 27 траўня.
DDoS-нападам называецца спосаб наўмыснага парушэння працы рэсурсу шляхам яго перагрузкі вялікай колькасцю запытаў.
Для ўдзелу было зарэгістравана 12 выбарчых спісаў, адзін з іх — “Закон і правапарадак” на чале з лідарам арганізацыі былых сілавікоў ByPol Аляксандрам Азаравым — 24 сакавіка быў выключаны з гонкі на фоне скандалу з агітацыяй праз чат-бот плана “Перамога”.
Раней рэжым Аляксандра Лукашэнкі прызнаў усе 12 выбарчых спісаў “экстрэмісцкімі фарміраваннямі”. Пазней Следчы камітэт адкрыў крымінальныя справы на 257 чалавек, якія выказалі жаданне балатавацца ў КР.
