Літоўскі памежнік застрэліў меркаванага кантрабандыста на мяжы з Беларуссю (дапоўнена)

2 чэрвеня, Позірк. Супрацоўнікі Службы аховы дзяржаўнай мяжы Літвы (САДМ) 1 чэрвеня каля 21:00 спрабавалі затрымаць кіроўцу аўтамабіля “Фольксваген Пасат” па падазрэнні ў кантрабандзе беларускіх цыгарэт.

Гэта прывяло да смерці падазраванага, які з’яўляўся грамадзянінам Літвы, паведамляе прэс-служба САДМ.

Інцыдэнт адбыўся ў Вільнюскім раёне недалёка ад мяжы з Беларуссю.

Адзначаецца, што супрацоўнікі пагранведамства мелі інфармацыю аб нелегальнай перавозцы цыгарэт беларускай вытворчасці і спрабавалі спыніць аўтамабіль для правядзення ператрусу. Аднак, гаворыцца ў паведамленні, кіроўца не падпарадкаваўся патрабаванню. Ён павялічыў хуткасць і спрабаваў схавацца.

“Яшчэ адзін памежнік знаходзіўся на шляху руху аўтамабіля, — апісвае сітуацыю ведамства. — Рухаючыся ў яго кірунку, уцякач, магчыма, спрабаваў збіць афіцэра САДМ, ён пазбег сутыкнення ў апошні момант”.

Паводле папярэдняй інфармацыі, указаны афіцэр, апынуўшыся ў “небяспецы для здароўя і жыцця”, зрабіў стрэл з табельнай зброі, спрабуючы трапіць у кола “Фальксвагена”. У выніку кіроўца атрымаў смяротнае раненне.

У паведамленні САДМ падкрэсліваецца, што неабходнасць спыніць аўтамабіль была таксама прадыктаваная размяшчэннем на шляху руху вёскі Табарышкес. Калі б транспартны сродак на вялікай хуткасці заехаў у населены пункт, гэта магло б стварыць небяспеку для яго жыхароў, заявілі ў ведамстве.

Паведамляецца, што пры ператрусе аўтамабіля выяўленыя “пачкі меркавана кантрабандных цыгарэт”. Паліцыя пачала дасудовае расследаванне інцыдэнту.

Як паведаміў 2 чэрвеня на спецыяльным брыфінгу кіраўнік САДМ Рустам Любаеў, загінулым з’яўляецца жыхар Вільнюса 1980 года нараджэння з “уражлівым крымінальным мінулым”.

“Ён неаднаразова быў судзімы за розныя злачынствы, у тым ліку за парушэнне дзяржаўнай мяжы і захоўванне акцызных тавараў. Таксама ён неаднаразова быў пакараны за іншыя адміністрацыйныя правапарушэнні”, — цытуе Любаева партал навінаў delfi.lt.

Кіраўнік пагранведамства падкрэсліў, што ў пагранічнай зоне могуць знаходзіцца толькі асобы, якія маюць адпаведныя пропускі. У пацярпелага такога дакумента не было.

Таксама Любаеў адзначыў, што афіцэр 1988 г.н., які зрабіў смяротны стрэл, з’яўляецца дасведчаным супрацоўнікам з 15-гадовым стажам. Яго “станоўча характарызуюць непасрэдныя кіраўнікі”, сказаў чыноўнік.