Беларус абвінавачваецца ў кіраўніцтве групай, якая арганізавала незаконны ўезд у Польшчу 2 тыс. мігрантаў

4 чэрвеня, Позірк. У Варшаве затрыманы 26-гадовы грамадзянін Беларусі, ён абвінавачваецца ў кіраўніцтве злачыннай групай, якая займалася арганізацыяй нелегальнай міграцыі, паведаміла 4 чэрвеня Памежная ахова Польшчы.

Паводле інфармацыі ведамства, у выніку дзейнасці гэтай групы ў краіну незаконна трапіла каля 2 тыс. чалавек.

Паведамляецца, што група выкарыстоўвала кампаніі, якія не вядуць ніякай эканамічнай дзейнасці, і падробленыя дакументы для атрымання замежнікамі віз (у асноўным працоўных), у тым ліку ў рамках праграмы Poland Business Harbour (PBH).

Абвінавачанні выстаўленыя 30 грамадзянам Польшчы, Беларусі і Украіны, чацвёра з іх змешчаныя пад арышт.

Пра дзейнасць групы стала вядома пасля таго, як супрацоўнікі памежнай службы ў Лодзі знайшлі ў аднаго з мігрантаў падробленыя дакументы. Высветлілася, што да прадстаўленай адным з беларусаў заявы аб выдачы нацыянальнай візы ў польскім консульстве ў Брэсце быў прыкладзены фальшывы дакумент аб прыёме на працу, які названая ў ім кампанія не выдавала.

У далейшым, адзначыла памежнае ведамства, удалося пацвердзіць фіктыўны характар выдадзеных дакументаў, а таксама прадпрымальніцкай дзейнасці. Следства па справе працягваецца, чакаюцца далейшыя арышты.

26 студзеня міністр замежных спраў Польшчы Радаслаў Сікорскі прыняў рашэнне прыпыніць удзел МЗС у PBH да прыняцця рашэнняў, якія гарантуюць “належную праверку кампаній і замежнікаў, што з’яўляюцца яе ўдзельнікамі”.

Паводле ацэнкі міністэрства, праграма “не апраўдала ўскладзеных на яе надзей”. “Сярод іншага, у грамадскай прасторы выказваліся сумневы наконт выкарыстання віз, выдадзеных у рамках праграмы, у мэтах, якія не адпавядаюць яе прынцыпам”, — адзначаў польскі МЗС.

Намеснік дырэктара Усходняга дэпартамента МЗС Польшчы Ганна Костшава-Мішталь 20 верасня 2023 года на III Беларускім бізнес-форуме ў Варшаве паведаміла, што за тры гады ў рамках PBH было выдадзена амаль 90 тыс. віз.

Праграма Poland Business Harbour была створана ў верасні 2020 года з мэтай прыцягнення ў Польшчу ІТ-спецыялістаў і кампаній з Беларусі, а затым была пашырана на такія краіны, як Грузія, Расія, Украіна, Малдова і Арменія.