На мяжы з Літвой затрымалі двух беларусаў з дронамі
4 чэрвеня, Позірк. Уначы 3 чэрвеня ў Гродзенскім раёне, за паўкіламетра ад мяжы з Літвой, затрымалі двух грамадзян Беларусі, паведамляе прэс-служба Дзяржаўнага пагранічнага камітэта.
У аўтамабілі і прычэпе пагранічнікі выявілі два квадракоптары і пульты кіравання да іх, 18 акумулятарных батарэй, ноўтбук і радыёстанцыю, а таксама “таварна-матэрыяльныя каштоўнасці”.
“Высветлена, што адзін з затрыманых прыцягваўся да крымінальнай адказнасці за незаконную прадпрымальніцкую дзейнасць, — сцвярджае Дзяржпагранкамітэт. — Мужчына незаконна вырабляў беспілотныя лятучыя апараты. Другі зламыснік неаднаразова прыцягваўся да адказнасці за парушэнне заканадаўства аб дзяржаўнай мяжы”.
Пры аглядзе месцаў пражывання мужчын выяўлена майстэрня для саматужнага вырабу беспілотнікаў, у якой было пяць радыёстанцый, наўтбукі, розныя мікрасхемы, гарнітуры, антэны, GPS-трэкеры, акумулятары да дронаў і зарадныя прылады, а таксама “прадмет, падобны да пнеўматычнага пісталета”.
Усё знойдзенае вынялі супрацоўнікі Гродзенскай пагранічнай групы. Распачаты адміністрацыйны працэс за “спробу незаконнага перасячэння мяжы і парушэнне памежнага рэжыму”.
Напрыканцы траўня Дзяржпагранкамітэт заявіў пра затрыманне экс-байца Французскага легіёна, які збіраў беспілотнікі для кантрабандыстаў.
19 траўня ў Воранаўскім раёне (Гродзенская вобласць) за 10 км ад мяжы з Літвой пагранічнікі затрымалі аўтамабіль з беларускім грамадзянінам за рулём. У машыне быў знойдзены беспілотны лятучы апарат самалётнага тыпу з двума прыстасаваннямі для яго запуску, тры акумулятарныя батарэі да яго, антэна, наўтбук.
У красавіку Дзяржпагранкамітэт паведаміў пра тры выпадкі незаконнага выкарыстання дронаў у прыграніччы, у агульнай складанасці затрымалі шэсць чалавек.
За “незаконнае ўтрыманне і выкарыстанне беспілотнікаў у памежнай зоне або памежнай паласе” прадугледжана адказнасць паводле арт. 24.19 КаАП, санкцыя — штраф да 50 базавых велічыняў (2.000 рублёў).
1 красавіка набыў моц указ № 297 “Аб дзяржаўным уліку і эксплуатацыі грамадзянскіх беспілотных лятучых апаратаў”. Дакумент забараніў увоз, захоўванне, абарот, эксплуатацыю і выраб беспілотнікаў і выкарыстанне імі паветранай прасторы Беларусі без належнага дазволу.
У выніку атакі БПЛА 26 лютага 2023 года ў Мачулішчах (Мінскі раён) атрымаў пашкоджанні і быў транспартаваны на рамонт у РФ дарагі расійскі ваенны самалёт далёкага радыёлакацыйнага выяўлення А-50.
7 сакавіка таго ж года, тлумачачы прычыны дыверсіі на вайсковым аэрадроме ў Мачулішчах, Лукашэнка заявіў, што сістэмы СПА не змаглі выявіць дрон з выбухоўкай, бо ён быў “маленькі”.