Дзяржпагранкамітэт: За апошні тыдзень Беларусь без віз наведаў 3.421 жыхар суседніх краін ЕС
10 чэрвеня, Позірк. З 4 па 10 чэрвеня Беларусь без віз наведаў 3.421 жыхар суседніх краін Еўрасаюза (з 27 траўня па 3 чэрвеня — 3.210), сведчыць праведзены “Позіркам” аналіз інфармацыі Дзяржаўнага пагранічнага камітэта.
За гэты перыяд у краіну прыбыла 1.136 грамадзян Літвы (1.195), 1.080 грамадзян і 347 неграмадзян Латвіі (878 і 296 адпаведна), 858 грамадзян Польшчы (841).
З 1 студзеня 2024 года бязвізам скарысталася 94.739 жыхароў гэтых краін: 43.384 грамадзяніны Літвы, 23.869 грамадзян і 6835 неграмадзян Латвіі, а таксама 20.651 грамадзянін Польшчы.
Усяго з пачатку дзеяння бязвізавага рэжыму ў Беларусь накіравалася 895.345 прадстаўнікоў гэтых дзяржаў: 538.595 грамадзян Літвы, 208.670 грамадзян і 62.950 неграмадзян Латвіі, а таксама 85.130 грамадзян Польшчы.
Бязвіз дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.
Улады названых суседніх краін неаднаразова заклікалі суайчыннікаў не наведваць Беларусь з меркаванняў бяспекі.
18 жніўня 2023 года Літва закрыла пункты пропуску Шумскас (з беларускага боку — Лоша) і Цвярачус (Відзы), 1 сакавіка 2024-га Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два пагранпераходы — Мядзінінкай (Каменны Лог) і Шальчынінкай (Беняконі).
Пасля вынясення палітычна матываванага выраку журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).
19 верасня 2023 года праз узрослую плынь нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).
