У спіс “экстрэмістаў” дададзена 20 чалавек, у тым ліку завочна асуджаны Краўцоў

14 чэрвеня, Позірк. У пералік асоб, “датычных да экстрэмісцкай дзейнасці”, 14 чэрвеня дададзена яшчэ 20 чалавек, цяпер у ім 4.154 пазіцыі.

Сярод уключаных у пералік — палітык Іван Краўцоў, завочна прыгавораны Мінскім гарадскім судом 16 траўня ў рамках спецыяльнай вытворчасці да 11 гадоў зняволення ва ўмовах узмоцненага рэжыму.

Насупраць прозвішча Краўцова ў спісе стаіць пазнака “знаходзіцца ў вышуку”. Паводле абноўленага пераліку, у месцах пазбаўлення волі знаходзяцца 3 чалавекі, насупраць 16 прозвішчаў стаіць пазнака “судзімасць не пагашаная”.

Сярод уключаных у спіс пяць жанчын, і, верагодна, адна сямейная пара (Аляксей і Інга Вераіціны).

У пералік уключаны палітвязень, жыхар Маладзечна (Мінская вобласць) Аляксандр Верасовіч. Паводле інфармацыі праваабаронцаў, ён прыгавораны да 6 гадоў пазбаўлення волі паводле арт. 361² (фінансаванне экстрэмісцкай дзейнасці) і 361³ (удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу). Разам з тым у спісе насупраць яго прозвішча стаіць пазнака “судзімасць не пагашана”, якая, як правіла, сведчыць пра прызначанае пакаранне, не звязанае з пазбаўленнем волі.

Іншыя ўключаныя ў пералік асобы, у тым ліку тыя, што адбываюць пакаранне, не прызнаныя праваабарончай супольнасцю палітвязнямі.

Фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.

Цягам пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.