Кіраўніца МЗС Латвіі абмяркуе з уладамі Польшчы сітуацыю ў Беларусі, сустрэнецца з Латушкам

18 чэрвеня, Позірк. Сітуацыя ў Беларусі стане адной з тэм перамоў міністра замежных спраў Латвіі Байбы Бражэ з уладамі Польшчы падчас візіту ў гэтую краіну 19–20 чэрвеня.

Прэс-служба латвійскага МЗС паведамляе, што чыноўніца таксама абмяркуе з польскімі афіцыйнымі асобамі двухбаковыя стасункі, падтрымку Украіны, умацаванне рэгіянальнай бяспекі і бяспеку знешніх межаў.

Адзначаецца, што ў рамках візіту міністр таксама сустрэнецца з кіраўніком Народнага антыкрызіснага ўпраўлення, намеснікам кіраўніцы Аб’яднанага пераходнага кабінета Паўлам Латушкам.

Сейм Латвіі зацвердзіў Байбу Бражэ — прафесійнага дыпламата, былую намесніцу генеральнага сакратара НАТО — на пасадзе кіраўніцы МЗС 19 красавіка.

Дэмакратычны лідар Святлана Ціханоўская, віншуючы чыноўніцу, адзначыла “назапашаныя веды” Бражэ і выказала спадзеў на хуткае супрацоўніцтва, паколькі Латвія з’яўляецца адным з “самых блізкіх сяброў і саюзнікаў” беларускіх дэмсіл.