Чарговы спецатрад унутраных войскаў будзе дыслакавацца ў Віцебску і Полацку
18 чэрвеня, Позірк. Створаны на базе вайсковай часці 5524 атрад спецыяльнага прызначэння “Віцязь”, байцы якога заступілі на баявое дзяжурства 18 чэрвеня, будзе дыслакавацца ў Віцебску і ў Полацку, паведаміў тэлеграм-канал унутраных войскаў МУС.
У задачы атрада ўваходзіць “барацьба з ДРГ і НУФ (дыверсійна-разведвальныя групы, незаконныя ўзброеныя фарміраванні. — “Позірк”.), адрасная праца з крымінальнай міліцыяй, спыненне масавых беспарадкаў і садзейнічанне органам пагранічнай службы ў ахове дзяржаўнай мяжы”.
На ўзбраенні падраздзялення знаходзяцца “найлепшыя і самыя сучасныя ўзоры тэхнікі і зброі, сродкі РЭБ (радыёэлектроннай барацьбы. — “Позірк”.), сувязі, разведкі, БЛА (беспілотныя лятальныя апараты. — “Позірк”.), бронеаўтамабілі”, падкрэслівае МУС.
23 красавіка паведамлялася аб фармаванні на базе вайсковай часці 6713 у Магілёве атрада спецыяльнага прызначэння “Гром”. У МУС адзначалі, што гэта быў 12-ы спецатрад у структуры ўнутраных войскаў, такім чынам, цяпер іх 13.
Вядомыя назвы 12 з іх: “Рысь”, “Беркут”, “Гонар”, “Смерч”, “Шторм”, “Тайфун”, “Буран”, “Цыклон”, “Тарнада”, “Граніт”, “Гром” і “Віцязь”.
Унутраныя войскі былі актыўна задзейнічаныя ў падаўленні масавых пратэстаў у 2020 годзе, яны таксама прыцягваліся да разгонаў вулічных акцый у ранейшыя гады.
З канца 2022 года ў іх складзе актыўна ствараюцца новыя спецпадраздзяленні, у першую чаргу з кантрактнікаў, якія раней адслужылі ва ўнутраных войсках.
