Польшча значна скараціла колькасць працоўных віз, якія выдаюцца беларусам
24 чэрвеня, Позірк. З пачатку 2024 года (па стане на 14 чэрвеня) Польшча выдала беларусам 32.233 працоўныя візы. Такія звесткі прыводзіць польскае выданне Rzeczpospolita са спасылкай на інфармацыю МЗС краіны.
“Годам раней”, як адзначае СМІ, іх было 114.598. Пры гэтым не ўдакладняецца, ці параўноўваецца колькасць віз з паказчыкам на аналагічную леташнюю дату.
Паводле дадзеных выдання, па гэтым паказчыку Беларусь сёлета саступіла першы радок Украіне, дзе таксама назіраецца значнае скарачэнне колькасці выдадзеных віз (да 47.257).
Таксама выданне адзначае спыненне выдачы віз па праграме Poland Business Harbour (РВН), якая была створана ў верасні 2020 года з мэтай прыцягнення ў Польшчу ІТ-спецыялістаў і кампаній з Беларусі, а затым была пашырана на такія краіны, як Грузія, Расія, Украіна, Малдова і Арменія.
16 чэрвеня прэм’ер-міністр Польшчы Дональд Туск на сваёй старонцы ў сацсетцы Х заявіў, што папярэдні ўрад завёз у краіну “сотні тысяч мігрантаў з Азіі і Афрыкі (заадно зарабляючы на візах), а таксама расійскіх і беларускіх “айцішнікаў”, дапамагаючы ствараць замежную агентуру ”.
Польская асацыяцыя распрацоўшчыкаў праграмнага забеспячэння (SoDA) 20 чэрвеня апублікавала зварот да Туска, у якім раскрытыкавала ягоныя словы.
“Мы хацелі б заявіць, што вышэйзгаданая заява выклікала трывогу, збянтэжанасць і мноства негатыўных эмоцый у ІТ-асяроддзі Польшчы. Многія прадстаўнікі профільных ІТ-прафесій успрынялі ваш выступ як несправядлівае і несправядлівае, — гаворыцца ў звароце. — Мы лічым, што словы, якія змяшчаюцца ў пасце, не пацвярджаюцца рэчаіснасцю”.
Грамадзянам Беларусі ў рамках PBH Польшча выдала 93 тыс. віз. Пры гэтым з 2020 года ў краіну заехала ўсяго каля 15 тыс. замежнікаў з візай PBH з розных дзяржаў.
