Прэзідэнт Польшчы навал “гібрыдную атаку” Мінска перашкодай для кітайскай ініцыятывы “Пояс і шлях”

26 чэрвеня, Позірк. “Гібрыдная атака” на беларуска-польскай мяжы стала перашкодай для рэалізацыі кітайскай ініцыятывы “Пояс і шлях”, заявіў 26 чэрвеня прэзідэнт Польшчы Анджэй Дуда па выніках сустрэчы са старшынёй КНР Сі Цзіньпінам.

Польскі лідэр паведаміў, што абмяркоўваў пытанні эканамічнага супрацоўніцтва, палітыкі і “самыя важныя на сёння — пытанні бяспекі” са старшынёй КНР “падчас сустрэчы сам-насам” на працягу чатырох гадзін.

“Я казаў у кантэксце нашых двухбаковых адносін з Кітаем, і палітыкі, якую мы праводзім гадамі <…> у рэалізацыі ідэі “Пояс і шлях”, дзе Польшча павінна была быць партнёрам Кітая, акном для Кітая ў Еўропу, не толькі ў наш [рэгіён ] <…>, не толькі ў цэнтральную Еўропу, але і ўвесь Еўрасаюз”, — падкрэсліў Дуда (цытата па трансляцыі яго канцылярыі ў сацсетках).

Паводле слоў прэзідэнта, менавіта ў бок Польшчы ідуць прамыя чыгуначныя пуці з Чэнду (міжнародны чыгуначны тэрмінал, асноўны чыгуначны хаб у паўднёва-ўсходняй правінцыі Кітая Сычуань, — “Позірк”.)”.

“Адзін з гэтых чыгуначных маршрутаў праходзіць праз Украіну і не дзейнічае праз тое, што там вайна, іншы праходзіць праз Беларусь. Беларуская гібрыдная атака на нашу мяжу, на жаль, моцна ўплывае на магчымасці гандлёвага абмену і перашкаджае гэтай ідэі “Пояса і шляха”, — падсумаваў Дуда.

Раней паведамлялася, што Дуда на перамовах з Сі Цзіньпінам 24 чэрвеня ў Пекіне закрануў пытанні, звязаныя з “ціскам, гібрыднай атакай”, якую “беларускія ўлады праводзяць на польскай мяжы з 2021 года”. Па выніках сустрэчы палітык зазначыў, што “падрабязна абмеркаваў сітуацыю” з кітайскім лідэрам, паведаміў аб праблемах трансгранічнага руху, якія ўзніклі з-за “негатыўнага стаўлення беларускіх уладаў”.

24 чэрвеня ў Мінску міністр замежных спраў Сяргей Алейнік па выніках перагавораў з расійскім калегам Сяргеем Лаўровым заявіў, што Беларусь гатова абмяркоўваць з Польшчай бяспеку на граніцы “на раўнапраўнай і ўзаемапаважлівай аснове”.

Паводле слоў Алейніка, “адзіны шлях дээскалацыі — гэта шлях да дыялогу”.

“Калі Польшча да гэтага гатова, хаця б па пытаннях прыгранічнага супрацоўніцтва, якое згорнута па ініцыятыве польскага боку і іншых еўрапейскіх партнёраў, то мы гатовы гэтыя тэмы абмяркоўваць”, — адзначыў ён.

Цяпер на мяжы Польшчы і Беларусі працуе два пункты пропуску: для пасажырскіх перавозак — Цярэспаль (з другога боку — Брэст), для грузавых — Кукурыкі (Казловічы).

6 чэрвеня стала вядома пра смерць польскага вайскоўца 1-й танкавай брыгады Матэвуша Сітэка, параненага нажом 28 траўня на мяжы з Беларуссю. Па інфармацыі Памежнай аховы Польшчы, вайсковец падвергся нападу мігранта, які ў складзе вялікай групы спрабаваў незаконна перасекчы мяжу з боку Беларусі.

13 чэрвеня на польска-беларускай мяжы распачала дзеянне буферная зона. Паводле інфармацыі МУС Польшчы, дзякуючы ёй колькасць спробаў парушэння мяжы скарацілася прыкладна на траціну.

Міграцыйны крызіс, які працягваецца з вясны 2021 года, Варшава, Рыга і Вільнюс называюць “гібрыднай атакай”, арганізаванай рэжымамі ў Мінску і Маскве.

З пачатку 2024 года суседнія краіны Еўрасаюза спынілі 22.6 тыс. спроб нелегальнага перасячэння мяжы мігрантамі з боку Беларусі, у тым ліку Польшча — амаль 19,9 тыс.

Не менш за 107 спроб нелегальнага перасячэння мяжы мігрантамі з боку Беларусі спынілі 25 чэрвеня суседнія краіны Еўрасаюза, сведчыць праведзены “Позіркам” аналіз даных пагранічных ведамстваў (суткамі раней — 87).

Польшча прадухіліла “больш за 100” спроб.

Пра тое, што Польшча разглядае магчымасць закрыцця ўсіх пераходаў на мяжы з Беларусь, заявіў 22 чэрвеня міністр замежных справаў Радаслаў Сікорскі.