Еўрасавет заклікаў да далейшых мер супраць абыходу санкцый у дачыненні да Беларусі і РФ

28 чэрвеня, Позірк. Заклік да “поўнага і эфектыўнага выканання санкцый” у дачыненні да Беларусі і Расіі, а таксама далейшых мер супраць іх абходу, у тым ліку праз трэція краіны, утрымліваецца ў высновах Еўрапейскага савета па выніках пасяджэння 27 чэрвеня.

Вышэйшы палітычны орган Еўрасаюза вітаў “прыняцце 14-га пакета санкцый супраць Расіі і пагадненне аб далейшых абмежавальных мерах у дачыненні да Беларусі”.

ЕС, згодна з дакументам, “па-ранейшаму глыбока занепакоены лёсам усіх украінскіх дзяцей і іншых грамадзянскіх асоб, незаконна дэпартаваных і перададзеных Расіі і Беларусі”.

“Еўрапейскі савет паўтарае свой настойлівы заклік да Расіі і Беларусі неадкладна забяспечыць іх бяспечнае вяртанне ва Украіну”, — гаворыцца ў высновах структуры.

Сярод іншага Еўрасавет рашуча асудзіў “усе віды гібрыднай актыўнасці, якая расце”, скіраванай супраць ЕС, яго членаў і партнёраў, “уключаючы запалохванне, сабатаж, падрыўную дзейнасць, замежныя інфармацыйныя маніпуляцыі і ўмяшанні, дэзінфармацыю, шкоднасную кіберактыўнасць і ператварэнне мігрантаў у інструмент для палітычных дзеянняў”.

У гэтым кантэксце не згадана якая-небудзь канкрэтная краіна. Разам з тым суседнія краіны ЕС абвінавачваюць рэжым Аляксандра Лукашэнкі ў арганізацыі міграцыйнага крызісу на мяжы, называючы яго “гібрыднай атакай” з боку Мінска і Масквы.

28 траўня стала вядома, што Агенцтва ўнутранай бяспекі Польшчы затрымала ў Варшаве траіх падазраваных у здзяйсненні і падрыхтоўцы падпалаў і дыверсій на тэрыторыі краіны. Заяўлялася, што сярод затрыманых двое беларусаў.

За тыдзень да гэтага польскі прэм’ер-міністр Дональд Туск заявіў, што сярод падазраваных у арганізаваных Расіяй спробах дыверсій маюцца грамадзяне Беларусі. Палітык у гэтым кантэксце згадаў спыненую спробу падпалу завода па вытворчасці фарбаў ва Ўроцлаве (Ніжнесілезскае ваяводства). Падобныя дзеянні, паводле яго інфармацыі, планаваліся ў Літве, Латвіі і Швецыі.