Палітзняволены грамадзянін Польшчы асуджаны ў Беларусі на 14 гадоў пазбаўлення волі

8 ліпеня, Позірк. Брэсцкі абласны суд прыгаварыў грамадзяніна Польшчы палітвязня Томаша Бярозу да 14 гадоў пазбаўлення волі ва ўмовах узмоцненага рэжыму, паведамляе праваабарончы цэнтр “Вясна”.

Мужчына прызнаны вінаватым паводле ч. 1 арт. 358¹ (агентурная дзейнасць) і арт. 358 (шпіянаж) Крымінальнага кодэкса.

Справу ў закрытым рэжыме разглядаў суддзя Сяргей Беразюк.

Праваабаронцы звяртаюць увагу, што прысуд быў вынесены 14 чэрвеня 2023 года, але вядома пра гэта стала толькі цяпер.

Бяроза адбывае тэрмін у папраўчай калоніі № 22 у Івацэвічах (Брэсцкая вобласць).

Праваабаронцам “Вясны” вядома яшчэ пра двух асуджаных палітвязняў, грамадзян Польшчы. Ежы Жывалеўскі прыгавораны да чатырох гадоў пазбаўлення волі паводле арт. 358¹ КК, Роберт Тампал — да трох гадоў зняволення паводле арт. 369 (абраза прадстаўніка ўлады) і арт.368 (абраза прэзідэнта) КК.

Палітвязень Раман Галуза ўтрымліваецца пад вартай, над ім цяпер ідзе суд паводле ч. 1 арт. 356 КК (здрада дзяржаве). Мужчына — ураджэнец Беларусі, аднак атрымаў польскае грамадзянства, паколькі вучыўся і жыў у Польшчы апошнія 9 гадоў. Вядома, што 19 ліпеня 2022 года ён прыехаў у Беларусь. У Польшчы займаўся валанцёрствам, у тым ліку дапамагаў беларускім палітычным уцекачам.

У 2022–2023 гадах контрвыведка Камітэта дзяржбяспекі затрымала 16 замежнікаў, заявіў старшыня КДБ Іван Церцель 20 лютага на пашыранай нарадзе Аляксандра Лукашэнкі з кіруючым складам сілавых органаў.

Пасля вынясення палітычна матываванага прысуду журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).

22 чэрвеня гэтага года міністр замежных спраў Польшчы Радаслаў Сікорскі заявіў, што Варшава разглядае магчымасць закрыць усе памежныя пераходы на мяжы з Беларуссю.

Аднак 3 ліпеня ён выказаў супрацьлеглае меркаванне, што Польшча не мае намеру закрываць мяжу з Беларуссю для пасажырскага руху.

Толькі ад Мінска залежыць, якімі будуць яго добрасуседскія адносіны з Польшчай, падкрэсліў Сікорскі. “Нашы базавыя патрабаванні — каб на волю выйшаў Анджэй Пачобут і спыніліся сілавая перакідка мігрантаў”, — дадаў міністр.