Законапраект, які прадугледжвае “падатак на багацце”, прыняты ў першым чытанні Палатай прадстаўнікоў
1 лістапада, Позірк. Распрацаваны Міністэрствам па падатках і зборах (МПЗ) праект закона “Аб змяненні Падатковага кодэкса Рэспублікі Беларусь” прыняты 1 лістапада ў першым чытанні Палатай прадстаўнікоў Нацыянальнага сходу (ПП НС).
Законапраект на пасяджэнні прадставілі міністр фінансаў Юрый Селіверстаў і член пастаяннай парламенцкай камісіі па бюджэце і фінансах Святлана Барташ, паведамляе прэс-служба ПП НС.
Дакумент прадугледжвае для шэрагу падаткаплацельшчыкаў павелічэнне адлічэнняў у бюджэт, калі іх даход перавысіць устаноўленую суму. У заяве ПП НС гэта вызначана як “сістэмныя меры па ўдасканаленні падатковага заканадаўства і дасягненні аптымальнага ўзроўню падатковай нагрузкі на эканоміку, не дапушчаючы зніжэння аб’ёму бюджэтных даходаў”.
Сярод іншага прапануецца:
індэксаваць стаўкі падаткаў з улікам інфляцыі;
адмяніць выплату падатку на дабаўленую вартасць для індывідуальных прадпрымальнікаў па рэалізацыі тавараў (работ, паслуг);
павялічыць стаўкі падатку на прыбытак для высокарэнтабельных арганізацый і прадпрыемстваў усіх формаў уласнасці з 20% да 25% пры атрыманні прыбытку звыш 25 млн рублёў у год;
Устанавіць стаўкі падаходнага падатку ў памеры 25% у дачыненні да даходаў фізічных асоб звыш 200 тыс. рублёў у год;
павысіць падаходны падатак да 30% для індывідуальных прадпрымальнікаў, сукупны даход якіх перавысіў 500 тыс. рублёў;
дазволіць падатковы вылік выпускнікам устаноў адукацыі, якія накіроўваюцца на працу па размеркаванні (у памеры мінімальнай заработнай платы на тэрмін да 7 гадоў);
павялічыць у 2–3 разы разліковую цану квадратнага метра пры налічэнні падатку на нерухомасць у дачыненні да камерцыйных плошчаў фізічных асоб звыш 200 квадратных метраў;
павялічыць у 10 разоў стаўкі транспартнага падатку па транспартных сродках падвышанай камфортнасці не старэйшыя за тры гады з моманту выпуску.
Адзначаецца, што законапраектам прадугледжваецца ўвядзенне паняцця “адзіны маёмасны плацёж”, які “ўяўляе сабой агульную суму падатку на нерухомасць, зямельнага падатку і транспартнага падатку і будзе выплачвацца фізічнай асобай на адзін рахунак рэспубліканскага бюджэту”.
Таксама ў дакуменце прадугледжана забарона на дзейнасць індывідуальных прадпрымальнікаў з прыбыткам звыш 500 тыс. рублёў. У гэтым выпадку “з наступнага каляндарнага года такі грамадзянін мае права працягнуць ажыццяўленне дзейнасці толькі ў статусе камерцыйнай арганізацыі”.
Чакаецца, што прапанаваныя змены ў Падатковы кодэкс усталююць “падатковую нагрузку ў 2024 годзе на ўзроўні 23,4% да ВУП”.
“У цэлым законапраект забяспечвае вырашэнне праблемных пытанняў падаткаабкладання з улікам вынікаў яго практычнага прымянення, далейшае спрашчэнне парадку вылічэння і выплаты канкрэтных падаткаў, аптымізацыю падатковых ільгот, удасканаленне падатковага адміністравання, а таксама палёгку ўспрымання плацельшчыкамі прадпісанняў Падатковага кодэкса”, — сцвярджаецца ў прэс-рэлізе.
Гл. таксама:
