“Кошт урада”: Эканоміка Беларусі выжывае тут і зараз, губляючы рэсурсы для доўгатэрміновага развіцця

19 ліпеня, Позірк. Цэнавая кан’юнктура ў беларускай эканоміцы “ўсё больш адрываецца ад рынку”, гаворыцца ў аналізе праекта “Кошт урада”.

Частка галін, на думку экспертаў, “жорстка рэгулюецца”, іншая — “моцна залежыць ад цэнавай сітуацыі на сусветных пляцоўках”.

Беларускія вытворцы, адзначаюць эканамісты, вымушаныя “дэмпінгаваць на знешніх рынках, дзе ўтрымліваць аб’ёмы паставак усё часцей даводзіцца, усталёўваючы заніжаныя цэны”.

У сувязі з гэтым атрымліваць ранейшы аб’ём выручкі за экспарт “часта ўдаецца толькі за кошт павелічэння аб’ёму паставак, але не росту цаны”, з-за чаго “пакутуе эфектыўнасць, зніжаецца прыбытак”.

“Эканоміка выжывае тут і цяпер, але губляе рэсурсы для доўгатэрміновага развіцця”, — робіць выснову праект “Кошт урада”.

Знешнегандлёвы абарот тавараў і паслуг Беларусі за студзень — травень 2024 года склаў 39 млрд 515,1 млн долараў — на 3,6% больш, чым за аналагічны перыяд 2023-га (38 млрд 156,5 млн), сведчаць папярэднія даныя Нацыянальнага банка.

Экспарт склаў 19 млрд 506,3 млн долараў (18 млрд 976,2 млн; +2,8%), імпарт — 20 млрд 8,8 млн (19 млрд 180,3 млн; +4,3%). Адмоўнае сальда склалася на ўзроўні 502,5 млн долараў (годам раней было -204 млн.; рост у 2,5 разы).

Спажывецкія цэны ў Беларусі ў чэрвені 2024 года выраслі на 0,6%: харчовыя тавары падаражэлі на 0,8%, нехарчовыя — на 0,4%, паслугі — на 0,5%.

Ад пачатку года рост цэн склаў 3,4%: на харчовую прадукцыю яны павялічыліся на 3,7%, нехарчовую — на 2,5%, паслугі — на 4%.

У гадавым выражэнні (да чэрвеня 2023-га) зафіксавана павелічэнне цэн на 5,8%: на харчовыя тавары — на 6,4%, нехарчовыя — на 4,5%, паслугі — на 6,6%.