Намеснік камандзіра Кабанчук: Канфлікту ў палку Каліноўскага няма

24 ліпеня, Позірк. Грамадскі рух “Каліноўцы” ствараецца не ў адказ на канфлікт у палку імя Кастуся Каліноўскага, “ды і ў прынцыпе канфлікту як такога няма”, заявіў на брыфінгу ў Кіеве 24 ліпеня намеснік камандзіра беларускага дабраахвотніцкага фарміравання Вадзім Кабанчук.

Паводле яго слоў, “Каліноўцы” — гэта “праект, які быў запланаваны пасля канферэнцыі [“Шлях да волі”]”, якая прайшла ў Кіеве ў лістападзе 2023 года.

“Гэта паслядоўнае развіццё стратэгіі, якая накіраваная на кансалідацыю беларускіх дэмакратычных і нацыянальна-вызваленчых сіл для процідзеяння расійскай агрэсіі і дэакупацыі Беларусі”, — падкрэсліў Кабанчук.

Гаворачы аб абстаноўцы ў палку, намеснік камандзіра адзначыў, што “ўсе хлопцы, якія праходзяць службу ў Замежным легіёне УСУ, <…> цяпер нясуць службу і паспяхова знішчаюць ворага”.

Рух “Каліноўцы” ён назваў, “безумоўна, часткай ПКК”, бо полк Каліноўскага з’яўляецца “вайскова-грамадскім праектам, які ўключае ў сябе не толькі дзейных вайскоўцаў УСУ, але і тых, хто раней праходзіў службу ў шэрагах УСУ або іншых добраахвотніцкіх фарміраваннях”.

“Для нас галоўны крытэр — ці падзяляе баец нашу місію, ці падпарадкоўваецца унутраным правілам палка, якія, звяртаю ўвагу, не супярэчаць статуту Узброеных сіл Украіны. Частка нашых хлопцаў і дзяўчат, якія нясуць службу ва УСУ, падпарадкоўваюцца ўкраінскай вайсковай іерархіі і выконваюць загады ўкраінскага камандавання”, — сказаў Кабанчук.

Адказваючы на пытанне, хто сёння кіруе ПКК, ён заявіў, што гэтыя функцыі ў якасці “часова выконваючага абавязкі камандзіра” выконвае Павел Шурмей (пазыўны “Дзядзька”).

22 ліпеня ў тэлеграм-канале ПКК з’явілася заява аб тым, што полк “губляе традыцыйныя элементы самакіравання, якія мелі месца быць з самага пачатку яго стварэння”, новыя ўмовы “пазбавілі магчымасці паўнавартаснага набору рэкрутаў”. Таксама было заяўлена аб нязгодзе з тым, каб лічыць Шурмея выконваючым абавязкі камандзіра.

З матэрыялу “Нашай Нівы” вынікае, што ў палку няма згоды адносна таго, што адбываецца з вайсковым фарміраваннем.

У інтэрв’ю на ютуб-канале Галоўнага ўпраўлення выведкі Украіны Шурмей заявіў, што распачатыя некалькі месяцаў таму рэформы ў палку накіраваныя на тое, каб палепшыць баяздольнасць і павялічыць фінансавую празрыстасць.

Паводле яго слоў, рэфармаванне неабходна, каб беларусы замежжа і іншыя людзі “яшчэ больш дапамагалі” палку фінансава, валанцёры хацелі працаваць з воінскім фарміраваннем. “Хочам палепшыць рэкрутынг, каб беларусаў і не толькі беларусаў з баявым досведам было яшчэ больш, каб у патрэбны момант гэты людзі маглі навучыць яшчэ больш людзей”, — дадаў Шурмей.

Ён адзначыў, што матэрыяльнае забеспячэнне палка ляжыць на вайсковай частцы УСУ, але шмат валанцёрскай дапамогі ідзе ад беларусаў свету, таму маецца магчымасць “набыць лепшую амуніцыю, абутак і адзенне”. Напрыклад, паведаміў ён, раней на грошы беларускай грамадскасці набылі ў ЗША прыцэлы для буйнакаліберных кулямётаў, аптычныя прыцэлы, лазерныя цэлеўказальнікі, якія тады немагчыма было атрымаць у вайсковай часці.

Пра тое, што былы камандзір ПКК Дзяніс ” Кіт “Прохараў стварае грамадскі рух “каліноўцы”, стала вядома 23 ліпеня.