Еўракамісія: Нацыянальныя органы павінны ацэньваць кожную канкрэтную сітуацыю ў дачыненні да беларускіх аўтамабіляў

24 ліпеня, Позірк. Нацыянальныя кампетэнтныя органы “павінны ацэньваць кожную канкрэтную сітуацыю і ўжываць забароны і выключэнні адпаведным чынам, добрасумленна і ў каардынацыі адзін з адным” пры выкарыстанні абмежаванняў для аўтамабіляў з беларускімі нумарамі, якія ўязджаюць і знаходзяцца ў Еўрасаюзе. Пра гэта заявіла “Позірку” прэс-сакратар Еўрапейскай камісіі па пытаннях фінансавых паслуг, фінансавай стабільнасці, падаткаабкладанне і мытні Франчэска Дальбоні.

Паводле яе слоў, пакет санкцый супраць Беларусі люстрана адбівае некаторыя з мер, ужо ўведзеных у дачыненні да Расіі, што робіць санкцыі ЕС супраць Расіі больш эфектыўнымі.

“Сярод іншага зноў прынятыя санкцыі ЕС накіраваны на тое, каб не даць рэжыму Лукашэнкі дыверсіфікаваць крыніцы даходаў, што дазваляе яму ўдзельнічаць у расійскай агрэсіі супраць Украіны”, — адзначыла Дальбоні.

У гэтым кантэксце, зазначыла прэс-сакратар, “забаронены імпарт аўтамабіляў з Беларусі ў ЕС, што зніжае гандлёвыя даходы беларускай эканомікі”.

“Існуе некалькі выключэнняў з гэтай забароны, у тым ліку для гуманітарных мэт, дыпламатычных місій і асабістага карыстання грамадзянамі ЕС і членамі іх сем’яў, якія пражываюць у Беларусі, а таксама грамадзянамі Беларусі, якія маюць сапраўдную візу або від на жыхарства”, — дадала яна.

29 чэрвеня Савет Еўрасаюза прыняў новыя абмежавальныя меры эканамічнага характару ў дачыненні да Беларусі ў сувязі з удзелам рэжыму Аляксандра Лукашэнкі ў расійскай агрэсіі супраць Украіны. Сярод іншага была пашырана забарона на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі.

З 16 ліпеня асобам на легкавых аўтамабілях з беларускімі нумарамі забаронена ўязджаць у ЕС праз пункты пропуску на мяжы Латвіі з Беларуссю і Расіяй, з 18 ліпеня — праз Літву (да 16 жніўня дзейнічае адтэрміноўка для прыватных асоб, якія не выкарыстоўваюць аўтамабіль у камерцыйных мэтах). Аналагічную забарону ўвяла Эстонія.

На палях саміту Еўрапейскай палітычнай супольнасці 18 ліпеня ў Вялікабрытаніі Ціханоўская папрасіла прэзідэнта Літвы Гітанаса Наўседу і прэм’ер-міністра Латвіі Эвіку Сіліня змякчыць забарону на ўезд аўтамабіляў з беларускімі нумарамі.

22 ліпеня ў Вільнюсе паміж офісам Ціханоўскай і прадстаўнікамі Польшчы, Літвы, Латвіі і Эстоніі адбыліся кансультацыі па новых абмежаваннях на ўезд аўтамабіляў з беларускай рэгістрацыяй.

23 ліпеня ў беларускіх тэлеграм-каналах і чатах з’явіліся паведамленні аб забароне з 1 жніўня ўезду ў Польшчу беларускіх аўтамабіляў. Гэтую інфармацыю апублікавалі некаторыя незалежныя СМІ. Яна была абвергнутая офісам Ціханоўскай са спасылкай на польскі МЗС.

Дэмакратычныя сілы будуць дамагацца паслаблення абмежаванняў для аўтамабіляў з беларускімі нумарамі пры ўездзе і знаходжанні на тэрыторыі Еўразвяза, заявіў 23 ліпеня галоўны дарадца Ціханоўскай Франак Вячорка.