Радыётэхнічная брыгада пад Мінскам адпрацавала “пытанні захавання жывучасці асабовага складу” з улікам “досведу СВА”

25 ліпеня, Позірк. “У абстаноўцы актыўнага супрацьборства беспілотнай авіяцыі і дыверсійна-разведвальным групам умоўнага суперніка” пад Мінскам прайшлі “тактычныя вучэнні з радыётэхнічнай брыгадай”, паведаміла 25 ліпеня Міністэрства абароны.

Адзначаецца, што “падраздзяленні здзейснілі маршы ў новыя раёны, нарасцілі радыёлакацыйнае поле і прыступілі да выканання задач баявога дзяжурства”, “на адным з участкаў мясцовасці аператыўна разгорнуты рухомы камандны пункт злучэння”.

Адпрацоўваліся “шматлікія пытанні, абапіраючыся на досвед СВА, такія ⟨…⟩, як захаванне жывучасці асабовага складу, захаванне тэхнікі ва ўмовах актыўнага ўздзеяння Дронов, актыўнага ўздзеяння беспілотных лятальных апаратаў”, заявіў камандзір радыётэхнічнай брыгады Сяргей Дамарацкі.

Таксама, паводле яго слоў, ажыццяўляліся “мерапрыемствы з шырокім прымяненнем манеўраў, актыўнага прымянення манеўраў сіл і сродкаў”, адпрацоўваліся “такія пытанні як не толькі вядзенне радыёлакацыйнай разведкі ў прызначаных раёнах, але і актыўны пошук радыёлакацыйных мэт”.

Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, якая вядзе РФ супраць Украіны пры падтрымцы афіцыйнага Мінска з 24 лютага 2022 года.

З 2023 года “вопыт СВА” рэгулярна фігуруе ў рэлізах сілавых ведамстваў аб правядзенні ў Беларусі розных вучэнняў.