У выніку непагадзі 28 ліпеня ніхто не пацярпеў — МНС
29 ліпеня, Позірк. Пацярпелых у выніку непагадзі 28 ліпеня няма, вынікае з паведамлення Міністэрства па надзвычайных сітуацыях.
Паводле інфармацыі ведамства, праз праходжанне навальнічнага фронту з парывамі ветру да 25 метраў на секунду пацярпеў адзін населены пункт у Слонімскім раёне (Гродзенская вобласць), пашкоджаны дах аднаго жылога дома.
Зафіксаваны 91 выпадак падзення дрэў: у Мінску — 13, Гродзенскай вобласці — 39, Мінскай — 18, Брэсцкай — 13, Віцебскай — 6, Гомельскай — 2. Паваленымі дрэвамі пашкоджана пяць аўтамабіляў.
У Мінскай вобласці супрацоўнікі МНС дапамагалі прыбіраць паваленыя дрэвы ў Барысаўскім, Валожынскім, Дзяржынскім, Капыльскім, Лагойскім, Мінскім і Маладзечанскім раёнах.
Ратавальнікі Гродзенскай вобласці выязджалі для ліквідацыі наступстваў непагадзі ў абласным цэнтры, а таксама Бераставіцкім, Ваўкавыскім, Воранаўскім, Гродзенскім, Дзятлаўскім, Лідскім, Мастоўскім, Навагрудскім, Ашмянскім, Свіслацкім, Слонімскім, Шчучынскім раёнах.
Падраздзяленні ратавальнікаў Гомельскай вобласці прыцягнулі да распілоўкі і ўборкі дрэў у Лельчыцкім і Рэчыцкім раёнах.
Са спасылкай на вытворчае аб’яднанне “Белэнерга” МНС паведаміла, што на працягу сутак у Беларусі “перыядычна парушалася электразабеспячэнне 588 населеных пунктаў, 40 сельскагаспадарчых будынкаў і 1.908 трансфарматарных падстанцый”. На 7:00 29 ліпеня без электразабеспячэння заставалася 165 населеных пунктаў.
Варта адзначыць, што Міністэрства энергетыкі раней паведаміла, што праз непагадзь парушалася электразабеспячэнне 566 населеных пунктаў, былі абясточаныя 1.874 трансфарматарныя падстанцыі, 38 ферм.
29 ліпеня ў Беларусі, паводле інфармацыі МНС, таксама чакаюцца складаныя ўмовы надвор’я: “У многіх раёнах прагназуецца ўзмацненне заходняга, паўночна-заходняга ветру парывамі 15–22 м/с, месцамі да 25–27 м/с, моцныя дажджы”.
Шкала Бофарта класіфікуе вецер хуткасцю 14–17 м/с як моцны (7 балаў з 12), 18–20 м/с — вельмі моцны (8 балаў), 21–24 м/с — шторм (9 балаў), 25–28 м/с — моцны шторм (10 балаў).