Праваабаронцы: Палітвязняў прымушаюць пісаць прашэнні аб памілаванні, караюць за адмову

29 ліпеня, Позірк. Паводле інфармацыі праваабарончага цэнтра “Вясна”, у наваполацкую калонію № 1 (Віцебская вобласць) штодзень прыязджаюць прадстаўнікі пракуратуры Мінска, якія “прымушаюць палітзняволеных пісаць прашэнні аб памілаванні”.

Праваабаронцы падкрэсліваюць, што гэта тычыцца толькі асуджаных на невялікія тэрміны.

“Таксама вядома, што ў некаторых калоніях палітвязняў за адмову пісаць прашэнне змяшчаюць у штрафны ізалятар, а некаторым пагражаюць узбуджэннем новай справы паводле арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы)”, — гаворыцца ў паведамленні.

Раней пра “масавы збор прашэнняў аб памілаванні ад палітвязняў у калоніях, турмах і папраўчых установах адкрытага тыпу” паведамляла праваабарончая ініцыятыва Dissidentby.

На пачатку ліпеня праваабаронцы паведамілі пра вызваленне 18 палітвязняў. Адразу стала вядома, што адзін з іх — прыгавораны да 10 гадоў пазбаўлення волі старшыня Партыі БНФ Рыгор Кастусёў, імёны астатніх не называліся. Пасля з’явілася інфармацыя пра выхад на волю Дар’і Лосік, Тамары Астрэйка, Святланы Лупач, Кацярыны Мадзянковай і Паліны Палавінка.

На 29 ліпеня ў Беларусі 1.378 чалавек, якіх праваабарончая супольнасць лічыць палітвязнямі. Насамрэч людзей, якія зазналі рэпрэсіі ў той ці іншай форме, значна больш.