У вышук у РФ аб’яўлены журналісты БРЦ і вядучы Чалы
31 ліпеня, Позірк. Заснавальнік і кіраўнік “Беларускага расследацыйнага цэнтра” Станіслаў Івашкевіч і аўтар відэапраграм гэтага медыяпраекта, аналітык Сяргей Чалы аб’яўлены ў вышук Міністэрствам унутраных спраў РФ.
Як паведаміў Беларускай асацыяцыі журналістаў Івашкевіч, “сёння можам гаварыць аб тым, што ў міждзяржаўны вышук аб’яўлены пяць былых і дзеючых супрацоўнікаў Беларускага расследавання”.
Першымі, паводле яго слоў, у спісе МУС РФ апынуліся члены каманды праекта “Бюро”, якія раней працавалі ў БРЦ: Аляксандр Ярашэвіч, Аляксей Карпека і Вольга Альхіменка.
Пасля праверкі базы даных расійскага ведамства ў ёй былі знойдзены Івашкевіч і Чалы.
На думку кіраўніка БРЦ, аб’ява ў вышук пяці дзеючых і былых супрацоўнікаў праекта “не звязана з нейкай крымінальнай справай у Расіі”.
“У Беларусі сілавікі прыходзілі па адрасах мяне і іншых людзей, не абавязкова звязаных з БРЦ сёння, прыблізна ў адзін час, [што] можа сведчыць пра тое, што гэта ўсё працяг раней заведзенай справы, — сказаў Івашкевіч. — Мяркую, што занясенне ў расійскую базу — гэта тэхнічнае наступства таго, што нас абвясцілі ў вышук беларускія ўлады”.
Паводле яго слоў, адказам на ціск з боку праекта стануць “новыя гучныя расследаванні, якія будуць прадстаўлены на працягу бліжэйшых месяцаў”.
БРЦ заснаваны ў 2018 годзе. Каманда медыяпраекта вымушана была з’ехаць з Беларусі ў 2021 годзе пасля разгрому сілавікамі студыі ў Мінску.
15 верасня на закрытым паседжанні Вярхоўны суд прызнаў БРЦ “экстрэмісцкай арганізацыяй”.
Журналіст Станіслаў Івашкевіч -—неаднаразовы пераможца творчага конкурсу БАЖ “Вольнае слова”, лаўрэат прэміі Global Anti Corruption Champions Award за 2023 год.
Эканаміст Сяргей Чалы вядзе перадачы на ютуб-канале БРЦ з 2022 года, лаўрэат прэміі Global Belarus Solidarity Award 2020.
На сайце МУС РФ даступны пошук, з дапамогай якога можна даведацца, ці ўнесены той ці іншы чалавек у базу крымінальнага вышуку на тэрыторыі Расіі.
Аб знаходжанні ў ёй журналістаў праекта “Бюро” стала вядома 26 ліпеня.