Ухвалены праект дагавора аб паветраных зносінах з Кеніяй

2 жніўня, Позірк. Аляксандр Лукашэнка адобрыў 31 ліпеня “ў якасці асновы для правядзення перагавораў” праект міжурадавага пагаднення паміж Беларуссю і Кеніяй.

Згодна з указам № 307, апублікаваным на Нацыянальным прававым інтэрнэт-партале, Міністэрства транспарту і камунікацый атрымала паўнамоцтвы на правядзенне перамоваў па ім.

Ведамству дазволена пры неабходнасці “ўносіць у яго змяненні, якія не маюць прынцыповага характару”, а таксама падпісаць дакумент пры “дасягненні дамоўленасці ў межах адобранага праекта” (з сам праект не публікуецца).

7 сакавіка ўрад ухваліў праект мемарандума аб узаемаразуменні па стварэнні сумеснай камісіі па двухбаковым супрацоўніцтве паміж Беларуссю і Кеніяй.

Згодна з дакументам, правядзенне перагавораў і падпісанне праекта даручалася Міністэрству замежных спраў.

У красавіку 2023 года падчас візіту кіраўніка МЗС Сяргея Алейніка (сышоў з пасады 27 чэрвеня 2024 года) у Кенію быў падпісаны мемарандум аб стварэнні механізма рэгулярных палітычных кансультацый паміж знешнепалітычнымі ведамствамі.

Лукашэнка на сустрэчы з прэзідэнтам Кеніі Уільямам Руто 10 снежня 2023-га заявіў аб неабходнасці “вызначыць напрамкі далейшага [двухбаковага] супрацоўніцтва і выйсці на нейкі канкрэтны план па гэтых напрамках”.

Зацікаўленасць у прамых авіязносінах была выказана 14 красавіка на перамовах Алейніка з міністрам замежных спраў Алжыра.

Прэс-служба МЗС паведамляла, што краіны дасягнулі “шэрагу важных дамоўленасцей”, накіраваных на “далейшае ўмацаванне двухбаковых сувязей”.

На думку бакоў запуск прамых авіязносін паміж Алжырам і Мінскам “будзе садзейнічаць павелічэнню турыстычных, дзелавых і культурных сувязей паміж двума народамі”.

5 красавіка ўхвалены праект аналагічнага пагаднення з Венесуэлай.

Таксама Мінск разлічвае на арганізацыю прамых авіярэйсаў на Сейшэлы і ў Аман.