З-за ўчарашняй залевы ў Мінску была парушана праца 82 маршрутаў грамадскага транспарту

7 жніўня, Позірк. Праца чатырох трамвайных, 25 тралейбусных і 53 аўтобусных маршрутаў (усяго — 82) мінскага гарадскога транспарту была парушана ў другой палове дня 6 жніўня, вынікае з праведзенага “Позіркам” аналізу аператыўных звестак ДП “Мінсктранс”. Затрымка руху складала ад 15 хвілін да 1 гадзіны 31 хвіліны.

МНС паведаміла, што “ў выніку выпадзення ападкаў у выглядзе дажджу (з 15:00 да 18:00 выпала да 23 мм ападкаў пры сярэднямесячнай норме 71 мм) у Кастрычніцкім, Маскоўскім, Першамайскім, Фрунзенскім і Цэнтральным раёнах г. Мінска былі падтопленыя дзевяць участкаў дарог, падземны паркінг, гандлёвы цэнтр і дваровая тэрыторыя шматпавярховага жылога дома”

“Пацярпелых няма. Работнікамі МНС і камунальнымі службамі праводзіліся работы па ліквідацыі наступстваў падтапленняў”, — адзначылі ў ведамстве і дадалі, са спасылкай на “Мінсктранс”, што з-за ўмоў надвор’я зафіксаваны 14 выпадкаў спынення руху грамадскага транспарту.

18 ліпеня залева, якая абрушылася на Мінск, паралізавала працу 40 маршрутаў мінскага грамадскага транспарту.