На чыгунцы ў Мінску здарылася ўцечка бензілхларыду

9 жніўня, Позірк. Уцечка небяспечнага рэчыва бензілхларыду здарылася 9 жніўня з вагона-кантэйнера на чыгуначных пуцях уздоўж вуліцы Казінца ў Мінску (брэсцкі напрамак).

МНС назвала гэта “кропельнай цечай” — “з расходам 15-20 кропель у хвіліну”.

На месца прыбылі спецыялісты хімічнай і радыяцыйнай аховы ведамства.

Цеча была знойдзеная дзяжурным персаналам станцыі (назва не прыводзіцца). Работнікі транспартавалі вагон на станцыю “Мінск-Сартавальны” для ўстаранення цечы.

Кантэйнер быў астуджаны са 100 да 23 градусаў, пары хімрэчыва асаджаныя, створана пенная падушка, “пасля чаго кантэйнер быў выкрыты і пачаты працы па выманні ёмістасцяў”.

Усяго было вынята 20 ёмістасцяў, бачных пашкоджанняў не знойдзена. Пацярпелых няма, эвакуацыя не праводзілася. Пагрозы жыццю і здароўю насельніцтва няма, паведамляе МНС.

Версія здарэння, якая разглядаецца, — негерметычнасць тары.