Удзельнікі “Кадравага рэзерву” падчас візіту ў Германію азнаёміліся з працай органаў дзяржкіравання краін ЕС

29 верасня, Позірк. Практычныя веды аб працы органаў кіравання краін Еўрасаюза атрымалі ўдзельнікі навучальнай праграмы дэмакратычных сіл “Кадравы рэзерв” падчас азнаямленчага візіту ў Германію.

Як паведаміў 29 верасня тэлеграм-канал праекта, падчас візіту прадстаўнікі беларускай дэлегацыі “паглыбіліся ў вывучэнне нямецкага досведу ў галіне дзяржаўнага кіравання, здабылі важныя інсайты і пазнаёміліся як з перадавым вопытам, так і з памылкамі ў дзяржкіраванні, якія варта ўлічваць у пабудове і развіцці нашай уласнай краіны”.

“Навучальныя візіты даюць унікальную магчымасць азнаёміцца з практычнымі аспектамі працы органаў кіравання ў краінах ЕС як на нацыянальным, так і рэгіянальным узроўні. Задаць любыя пытанні і атрымаць на іх абсалютна шчырыя і разгорнутыя адказы. Зразумець, чым кіруюцца палітыкі, прымаючы рашэнні на міжнародным узроўні, у тым ліку па пытаннях, якія тычацца грамадзян Беларусі”, — адзначыў па выніках наведвання Германіі каардынатар праекта Юрый Губарэвіч.

Паводле яго слоў, увосень перад удзельнікамі праграмы “стаіць задача зрабіць некалькі падобных візітаў у органы дзяржаўнага кіравання Польшчы і Літвы”.

Візіт у Германію прайшоў 18–21 верасня, 10 удзельнікаў праграмы наведалі Берлін і Дрэздэн.

15 лістапада 2022 года Аб’яднаны пераходны кабінет (АПК) абвясціў аб стварэнні навучальнай праграмы “Кадравы рэзерв для новай Беларусі”. Намеснік прадстаўніка АПК па транзіце ўлады, лідар руху “За Свабоду” Юрый Губарэвіч паведаміў аб анлайн-платформе, на якой можна запоўніць заяўку на ўдзел у праекце. Заяўлялася, што падрыхтоўка новых кадраў будзе весціся праз стажыроўкі ў краінах Еўрасаюза.

Сёлета на пачатку лютага АПК уключыў праект у справаздачны спіс сваіх дасягненняў. Паведамлялася, што ў рамках ініцыятывы апрацавана 170 заявак на навучанне, 17% якіх падалі асобы, што працуюць у дзяржсектары.