У Польшчы за перавозку наркотыкаў і кіраванне аўтамабілем у стане ап’янення затрыманы беларус

3 студзеня, Позірк. Паліцыя польскага Сопата 1 студзеня затрымала 32-гадовага грамадзяніна Беларусі, які кіраваў аўтамабілем BMW у стане алкагольнага і наркатычнага ап’янення, а таксама перавозіў значную колькасць наркотыкаў. Аб гэтым са спасылкай на інфармацыю PAP паведаміў партал мясцовага самакіравання краіны.

Паводле інфармацыі прэс-сакратара паліцыі горада Люцыны Рэкоўскай, у крыві беларуса было 1,5 праміле алкаголю, а ў аналізе сліны змяшчаліся сляды марыхуаны. Пры гэтым кіроўца “адчуваў цяжкасці з самавыяўленнем”.

Адзначаецца, што пры вобшуку аўтамабіля было знойдзена 268 порцый клефедрону і некалькі порцый сушаных раслін канабіс, гашыш і іншых псіхатропных рэчываў. 3 студзеня суд разгледзіць хадайніцтва пракуратуры аб часовым арышце падазраванага.

У Польшчы захоўванне значнай колькасці наркотыкаў караецца пазбаўленнем волі на тэрмін да 10 гадоў, а кіраванне аўтамабілем у стане алкагольнага або наркатычнага ап’янення — да трох гадоў.