СМІ: Беларускі Чырвоны Крыж пазбавіцца больш за 4 млн рублёў праз прыпыненне членства ў міжнароднай федэрацыі

9 студзеня, Позірк. Беларускі Чырвоны Крыж (БЧК) пазбавіцца фінансавання на суму больш за 4,4 млн рублёў у выніку прыпынення з 1 снежня 2023 года членства ў Міжнароднай федэрацыі таварыстваў Чырвонага Крыжа і Чырвонага Паўмесяца (МФТЧКіЧП), вынікае са звестак, агучаных расследвальніцкім цэнтрам “Бюро Медыя”.

Паведамляецца, што ў распараджэнне журналістаў трапілі 40 тыс. файлаў унутранай дакументацыі БЧК.

Паводле звестак выдання, у 2022 годзе БЧК атрымаў ад міжнародных донараў амаль 13 млн рублёў, што складае 57,2% усяго бюджэту арганізацыі.

На долю МФТЧКіЧП прыпадае 34% усіх замежных паступленняў, адзначаецца ў расследаванні. Такім чынам, пры захаванні такога ж аб’ёму фінансавання арганізацыя магла атрымаць у 2024 годзе, але пазбавілася 4,42 млн рублёў.

“Бюро Медыя” адзначае, што ў пачатку 2023 года БЧК атрымаў ад ЮНІСЕФ 210 тыс. долараў на праект “Выяўленне, асноўныя паслугі, матэрыяльная дапамога і інтэграцыя сем’яў з дзецьмі з Украіны ў Рэспубліцы Беларусь”. З названай сумы 124 тыс. выдадзены грашыма, астатняе — таварамі.

“Для таго, каб асвоіць 124 тыс. долараў, ад БЧК у праекце прадугледжаны 21 пазіцыя розных каардынатараў праекта і 8 сацыяльных работнікаў. Дадамо псіхолагаў, фінансавых менеджараў, кіроўцаў, валанцёра, інфармацыйных прадстаўнікоў і атрымаем 59 чалавек у праекце”, — адзначаюць расследвальнікі.

У асобным артыкуле бюджэту на забеспячэнне “эфектыўным упраўленнем” праекта прадугледжана 58.25 тыс. долараў, на аплату штата супрацоўнікаў — каля 80 тыс. долараў.

Таксама ў расследаванні згадваецца некалькі камандзіровак кіраўнікоў БЧК, на якія былі выдаткаваныя значныя сумы.

Сцвярджаецца, што ў траўні 2022 года дзевяць супрацоўнікаў Беларускага Чырвонага Крыжа наведалі Турцыю, на квіткі было выдаткавана каля 4.3 тыс. долараў. У расследаванні адзначаецца, што запрашэнне ў Стамбул было на пяць дзён, але дэлегацыя знаходзілася там дзевяць. Паводле падліку “Бюро Медыя”, прыкладныя выдаткі на пражыванне і харчаванне склалі з улікам авіябілетаў больш за 15 тыс. долараў.

Паездка ў Стамбул аплачвалася на дваіх супрацоўнікаў з грошай МФТЧКіЧП, на астатніх — з уласных сродкаў БЧК (ахвяраванні, спонсарская дапамога і сяброўскія складкі).

У матэрыяле згадваецца паездка пяці супрацоўнікаў арганізацыі ў Рым. Квіткі абышліся прыкладна ў 6.4 тыс. еўра, пражыванне амаль у 5 тыс. МФТЧКіЧП пакрыла выдаткі на суму не больш за 7.5 тыс. еўра, астатнія сродкі БЧК вылучыў з уласных сродкаў.

Пры гэтым у расследаванні адзначаецца: “БЧК парушыў пастанову Саўміна па дапушчальных выдатках на жыллё. Павінна быць 135 еўра за ноч, а ў аднаго з членаў дэлегацыі — нумар прэміум коштам амаль 1.200 еўра за шэсць начэй, або 235 еўра за ноч. Гэта значыць, выдаткі на пражыванне больш чым у паўтара разы вышэй за норму. Каму дастаўся гэты нумар — застаецца толькі здагадвацца. Але і іншыя нумары даражэйшыя за ўстаноўленую норму”.

Як паведамлялася, 1 снежня МФТЧКіЧП прыпыніла сяброўства БЧК праз невыкананне кастрычніцкага патрабавання федэрацыі вызваліць ад пасады генеральнага сакратара Дзмітрыя Шаўцова, які абвінавачваецца ў дачыненні да вывазу дзяцей з акупаваных тэрыторый Украіны, а таксама адзначыўся рэзананснымі заявамі аб размешчанай у Беларусі расійскай ядзернай зброі.

“Адхіленне азначае, што БЧК губляе свае правы члена МФТЧКіЧП. Любое новае фінансаванне ў дачыненні да Беларускага Чырвонага Крыжа таксама будзе прыпыненае, — паведаміла міжнародная федэрацыя. — Акрамя таго, БЧК не зможа ўдзельнічаць у Генасамблеі МФТЧКіЧП, а таксама галасаваць або быць абраным на якіх-небудзь статутных сходах МФТЧКіЧП”.

БЧК можа быць адноўлена ў правах, як толькі “выканае рашэнне праўлення” і адхіліць дзеючага генеральнага сакратара ад пасады.

Прэтэнзіі да генеральнага сакратара арганізацыі ўзніклі праз ягоныя візіты ў акупаваныя РФ украінскія гарады Луганск і Данецк, заявы аб перамяшчэнні ўкраінскіх дзяцей з акупаваных тэрыторый і інш.

Беларускі бок не адмаўляе факту вывазу ўкраінскіх дзяцей з акупаваных тэрыторый, заяўляючы, што гэта робіцца для іх аздараўлення і са згоды іх законных прадстаўнікоў.

20 ліпеня ў эфіры дзяржканала АНТ Шаўцоў заявіў аб магчымасці выкарыстання размешчанай у Беларусі расійскай тактычнай ядзернай зброі.

Удакладніўшы, што ён “ні да чаго не заклікае”, генеральны сакратар БЧК сказаў: “Можа быць, варта ўсё ж такі людзям [на Захадзе] намякнуць, што мы не проста вам кажам і папярэджваем, а мы гэта канкрэтна можам зрабіць, калі вы не супакоіцеся. Я разумею, што гэта будзе суперэскалацыя. Але рана ці позна да гэтага прыйдзе. Прыйдзецца проста даць трошкі па зубах”.