Мінлясгас паведаміў пра пажар на балоце ў Столінскім раёне
9 кастрычніка, Позірк. Пра пажар на балоце ў Кашара-Альманскім лясніцтве Столінскага лясгаса (Брэсцкая вобласць) паведаміла Міністэрства лясной гаспадаркі.
Узгаранне здарылася 8 кастрычніка, у тушэнні ўдзельнічалі работнікі двух лясгасаў — Столінскага і Палескага — усяго каля 25 чалавек, паведамілі ў ведамстве.
Падкрэсліваецца, што тушэнню перашкаджалі “моцны вецер і багністая, цяжкапраходная мясцовасць”. Нягледзячы на гэта, “буйны лясны масіў удалося адстаяць”.
У лакалізацыі ўзгарання былі задзейнічаныя два гусенічныя ўсюдыходы, два пажарныя аўтамабілі і два трактары з плугам.
Пажар быў лакалізаваны да вечара 8 кастрычніка, на раніцу 9-га праходзілі “мерапрыемствы па яго канчатковай ліквідацыі”, гаворыцца ў паведамленні.
10 красавіка на прэс-канферэнцыі начальнік цэнтра ўзаемадзеяння з грамадскасцю і СМІ МНС Максім Клачко паведаміў, што падраздзяленнямі Міністэрства па надзвычайных сітуацыях зафіксаваны 81 лясны пажар, тры тарфяных, 2.283 гарэнні травы і кустоў, на ўказаную дату здарылася 2.547 пажараў (на аналагічную дату 2025-га — 2.103, +21,1%), загінула 248 чалавек (212; +17%).
Нягледзячы на тое, што за пяць гадоў колькасць лясных пажараў у Беларусі зменшылася, кошт шкоды ад іх істотна ўзрос, сведчыць праведзены “Позіркам” аналіз даных Нацыянальнага статыстычнага камітэта.
23 ліпеня 2025 года паведамлялася, што Фонд глабальнага развіцця і супрацоўніцтва “Поўдзень-Поўдзень” (Кітай) выдзеліць Беларусі 2 млн долараў на ахову лясоў ад пажараў.
Беларусь на працягу апошніх 10–15 гадоў атрымлівала сістэматычнае фінансаванне ў рамках праектаў з Еўрапейскім саюзам па лініі абароны лясоў і падтрымкі службы выратавання.
Супрацоўніцтва ЕС з Мінскам у выглядзе міжнароднай тэхнічнай дапамогі было прыпынена амаль па ўсіх напрамках у сувязі з рэпрэсіямі пасля прэзідэнцкіх выбараў 2020 года і ўдзелам краіны ў расійскай агрэсіі супраць Украіны.
