Памежная служба Літвы: Затрыманыя нелегальныя мігранты паскардзіліся на збіццё беларускімі памежнікамі

24 кастрычніка, Позірк. У Ігналінскім раёне Літвы 23 кастрычніка затрымалі групу 14 нелегальных мігрантаў (сярод іх дзве жанчыны), якія прарваліся з Беларусі праз ахоўную агароджу. Пяцём з іх спатрэбілася медыцынская дапамога, паведамляе Памежная служба краіны.

Мігранты скардзіліся “на грубыя паводзіны і збіццё з боку беларускіх пагранічнікаў”, сцвярджае ведамства. Людзі заяўлялі, што іх білі па нагах, а некалькім зламалі ногі. Адзін мужчына расказаў, што беларусы аблілі яго вадой, а затым ударылі электрычным токам у пахвіну, гаворыцца ў рэлізе.

Пасля медыцынскага абследавання абедзве жанчыны былі адпушчаны 23 кастрычніка. Адна з іх грамадзянка Сенегала, іншая прадставілася грамадзянкай Емена, але дакументаў у яе не было.

У бальніцы ў Літве застаўся грамадзянін Самалі без дакументаў з расцяжэннем звязкаў на назе і сірыец без дакументаў, у якога медыкі дыягнаставалі абмарожанне ступні.

З 3 жніўня 2021 года, калі супрацоўнікі Памежнай службы Літвы атрымалі права не прапускаць нелегальных мігрантаў з Беларусі, туды было вернута 21.430 мігрантаў, у тым ліку ў 2023-м — 2.113.

За папярэдні дзень, 23 кастрычніка, краіны ЕС не дазволілі нелегальна пракрасціся 134 мігрантам з тэрыторыі Беларусі (суткамі раней — 276).

Служба аховы дзяржаўнай граніцы Літвы зафіксавала 20 спроб незаконнага перасячэння граніцы з беларускага боку (17).

Міграцыйны крызіс на граніцы Беларусі і краін ЕС пачаўся вясной 2021 года.