Прыгавораны да смерці Крыгер папрасіў Лукашэнку аб памілаванні (дапоўнена)

30 ліпеня, Позірк. Прыгавораны ў Беларусі да смяротнага пакарання грамадзянін Германіі Рыка Крыгер звярнуўся з прашэннем аб памілаванні да Аляксандра Лукашэнкі, вынікае з паведамлення неафіцыйнага тэлеграм-канала прэс-службы апошняга.

Цяпер у Лукашэнкі праходзіць нарада з “людзьмі, пагружанымі ў працэс”, каб “пачуць падрабязнасці, меркаванні, параіцца”. Сярод іншых у сустрэчы бяруць удзел намесніца кіраўніка Адміністрацыі прэзідэнта Вольга Чупрыс, прапагандыстка Людміла Гладкая, якая была на судзе па справе Крыгера.

24 чэрвеня Мінскі абласны суд (суддзя Алег Лапека) вынес Крыгеру смяротны прыгавор. Вядома пра гэта стала 19 ліпеня.

Грамадзянін ФРГ прызнаны вінаватым паводле ч. 4 арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), ч. 4 арт. 309 (наўмыснае прывядзенне ў непрыдатнасць транспартнага сродку або шляхоў зносін), ч. 3 арт. 361¹ (стварэнне экстрэмісцкага фарміравання або ўдзел у ім), ч. 3 арт. 289 (акт тэрарызму), арт. 358¹ (агентурная дзейнасць) і арт. 133 (наёмніцтва) Крымінальнага кодэкса.

23 ліпеня канцлер ФРГ Олаф Шольц адмовіўся каментаваць магчымы абмен меркаванага афіцэра ФСБ Расіі Вадзіма Красікава, прыгаворанага ў Германіі да пажыццёвага тэрміну, у тым ліку на Крыгера, паведаміла руская служба “Радыё Свабода”.

“Прынцып захавання дзяржаўных інтарэсаў не дазваляе мне спекуляваць на такія тэмы”, — сказаў Шольц.

На тэлеканале “Беларусь 1” увечары 25 ліпеня паказалі маналог Крыгера. Ён распавёў пра сустрэчу з нямецкімі дыпламатамі і пра тое, што яны мелі магчымасць сачыць за судовым працэсам, але адмовіліся дапамагчы.

У сюжэце сцвярджалася, што Крыгер быў завербаваны Службай бяспекі Украіны для здзяйснення тэрактаў у Беларусі.

Прадстаўнік МЗС Германіі Крысціян Вагнер на прэс-канферэнцыі ў Берліне 22 ліпеня заявіў, што Берлін “абараняе інтарэсы прыгаворанага да смяротнага пакарання грамадзяніна ФРГ Рыка Крыгера перад беларускімі ўладамі”.

МЗС Беларусі 20 ліпеня паведаміла, што беларускі бок прапанаваў Германіі “канкрэтныя рашэнні па наяўных варыянтах развіцця сітуацыі”.

24 лютага 2022 года Расія пачала поўнамаштабную вайну супраць Украіны, называючы яе “спецыяльнай ваеннай аперацыяй”.

На першапачатковым этапе ўварвання беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Аляксандр Лукашэнка неаднаразова заяўляў, што падтрымлівае РФ у яе дзеяннях.