ДПК зноў затрымаў карыстальніка беспілотніка

17 жніўня, Позірк. Лідскія пагранічнікі 15 жніўня ў раёне а.г. Азёры Гродзенскай вобласці затрымалі жыхара абласнога цэнтра “з БПЛА саматужнай вытворчасці з пультам дыстанцыйнага кіравання”, паведамляе Дзяржаўны пагранічны камітэт.

“Беспілотнік і камплектуючыя канфіскаваны і дастаўлены ва ўпраўленне Лідскага пагранічнага атрада для правядзення далейшага разбору. У дачыненні да затрыманай асобы распачаты адміністрацыйны працэс па ч. 1 арт. 24.19 КаАП ⟨…⟩ (парушэнне памежнага рэжыму).

Ведамства чарговы раз нагадала, што з 1 красавіка ўступіў у сілу ўказ ад 25 верасня 2023 года № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”, якім забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.

Акрамя таго, незаконнае ўтрыманне і выкарыстанне беспілотнікаў у пагранічнай зоне або пагранічнай паласе з’яўляюцца парушэннем пагранічнага рэжыму і прыводзяць да адміністрацыйнай адказнасці.

ДПК перыядычна паведамляе аб затрыманнях людзей з БПЛА ў прыграніччы. У прыватнасці, выпадкі адзначаны 2 і 15 жніўня.