Лукашэнка разлічвае “на якасна новы ўзровень” супрацоўніцтва з Туркменістанам
27 верасня, Позірк. Мінск і Ашхабад “сумеснымі намаганнямі змогуць задзейнічаць патэнцыял двухбаковага супрацоўніцтва і вывесці яго на якасна новы ўзровень”, заявіў Аляксандр Лукашэнка, віншуючы 27 верасня прэзідэнта Туркменістана Сердара Бердымухамедава з Днём незалежнасці.
“Прытрымліваючыся ўласнага шляху развіцця і будучы прыкладам пастаяннага нейтралітэту, Ашхабад забяспечвае паступальны рост дабрабыту грамадзян краіны, уносіць важкі ўклад у забеспячэнне міжнароднай бяспекі і стабільнасці”, — цытуе віншавальніка яго прэс-служба.
Сердар Бердымухамедаў — сын свайго папярэдніка, другога прэзідэнта Туркменістана Гурбангулы Бердымухамедава, які кіраваў краінай у 2007–2022 гадах. Фактычна быў вылучаны бацькам, перамог на датэрміновых выбарах, якія міжнародная супольнасць не прызнала свабоднымі і справядлівымі.
Узаемны тавараабарот Беларусі і Туркменістана ў 2021 годзе склаў 20,8 млн долараў (беларускі экспарт — 13,7 млн). Актуальных даных у адкрытым доступе няма.
