У Пінску за “ўдзел у пратэстах” будуць судзіць журналіста Яўгена Мікалаевіча

20 верасня, Позірк. 26 верасня ў судзе горада Пінска і Пінскага раёна (Брэсцкая вобласць) пачнецца судовы працэс у дачыненні да журналіста Яўгена Мікалаевіча, паведаміла Беларуская асацыяцыя журналістаў (БАЖ).

БАЖ адзначае, што Мікалаевіч чатыры гады таму супрацоўнічаў з рэгіянальным выданнем “Медыя-Палессе” ў якасці відэааператара і атрымаў рэдакцыйнае заданне асвятляць пратэсты, якія адбыліся ў горадзе пасля прэзідэнцкіх выбараў. Цяпер яму ставяць у віну здзяйсненне злачынства, прадугледжанага артыкулам 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).

Паведамляецца, што яго затрымлівалі 10 жніўня 2020 г. падчас выканання прафесійных абавязкаў. Відавочцы тых падзеяў сцвярджаюць, што супрацоўнікі міліцыі спачатку збілі журналіста ў туалеце Пінскага гарвыканкама, а потым у аўтазаку.

Пасля затрымання Яўгена Мікалаевіча прывезлі ў Пінскі ГАУС, пасля ён трапіў у мясцовы ізалятар часовага ўтрымання, а неўзабаве быў чамусьці адвезены ў штрафны ізалятар папраўчай калоніі ў Івацэвічах (там сілавікі размясцілі частку затрыманых).

Людзі, якія бачылі журналіста праз тыдзень пасля затрымання, расказвалі, што на яго твары ўсё яшчэ заставаліся наступствы збіцця сілавікамі. Выданне “Медыя-Палессе” таксама пісала тады пра пашкоджанае вока свайго супрацоўніка.

Апошні відэасюжэт аўтарства Мікалаевіча, які даступны на сайце выдання, пазначаны чэрвенем 2021 года. Ці заставаўся ён апошнім часам у журналістыцы — невядома, адзначае БАЖ.

Паводле звестак БАЖ, у няволі знаходзяцца 33 прадстаўнікі медыя.