Расія ўспрымае Украіну і Беларусь як дзяцей, якія не маюць права самі вызначаць сваю будучыню — Ціханоўская
25 верасня, Позірк. “Калі ў доме вашага суседа пажар, а вы застаецеся безуважнымі, спасылаючыся на стомленасць, агонь можа перакінуцца на вашу хату. У кожнага ўплывовага лідэра ёсць маральнае абавязацельства не прытрымлівацца наратыву стомленасці, а дапамагаць сваім суседзям”, — заявіла дэмакратычны лідэр Святлана Ціханоўская на 14-м міжнародным саміце арганізацыі Concordia у Нью-Йорку, звяртаючыся да еўрапейскіх палітыкаў
Відэазапіс выступу дэмлідара прадставіў “Позірку” яе галоўны дарадца Франак Вячорка.
Адзначыўшы, што “без свабоднай Украіны не будзе свабоднай Беларусі”, Ціханоўская падкрэсліла, што “без свабоднай дэмакратычнай Беларусі будзе існаваць пастаянная пагроза Украіне і <…> заходнім суседзям”.
“Трэба глядзець на Беларусь не толькі як на праблему, але таксама як на частку яе вырашэння, таму што людзі ў Беларусі аб’яднаны супраць дыктатуры, дыктату Расіі, у падтрымку Украіны”, — заявіла дэмлідар.
Паводле Ціханоўскай, “на працягу апошніх чатырох гадоў Беларусь застаецца ГУЛАГам, Іранам сталінскага стылю”.
Рэпрэсіі схільныя ўсім, хто выступае супраць рэжыму Аляксандра Лукашэнкі, падтрымлівае барацьбу Украіны і беларускіх добраахвотнікаў, якія ваююць на яе баку. Яны “аб’яўляюцца ворагамі рэжыму і пераследуюцца”.
“Тыя, хто пакінуў Беларусь, а такіх каля 500 тысяч, могуць быць больш актыўнымі, хаця іх сваякі ў Беларусі пераследуюцца, уласнасць канфіскуецца, але нягледзячы на гэта, у іх ёсць больш магчымасцей”, — заявіла дэмлідар.
Паводле яе, “Расія глядзіць на Украіну і Беларусь, як на дзяцей, якія не маюць права выбіраць сваю будучыню самастойна”.
“Але мы з’яўляемся часткай Еўропы, жадаем вярнуцца ў еўрапейскую сям’ю. Ні мы, ні ўкраінцы не просім зрабіць працу замест нас, мы просім дапамагчы нам зрабіць тое, што мы павінны”, — дадала палітык.
“Нам патрэбная салідарнасць, украінцам — зброя для барацьбы. Вы — магутныя дэмакратычныя краіны, у вас ёсць магчымасці дапамагчы суседзям”, — заявіла яна.
Concordia — некамерцыйная арганізацыя заснаваная ў 2011 годзе. Штогадовы саміт Concordia — гэта найбуйнейшы і найбольш інклюзіўны беспартыйны форум, які праходзіць паралельна з Генеральнай Асамблеяй ААН. Мерапрыемства садзейнічае партнёрству паміж урадамі, прадпрыемствамі і некамерцыйнымі арганізацыямі для вырашэння самых надзённых патрэб свету.
Concordia таксама праводзіць рэгіянальныя саміты, прысвечаныя Паўночнай і Паўднёвай Амерыцы, ЗША, Еўропе і Афрыцы.