Лукашэнка атрымаў ордэн з рук Пуціна і паабяцаў “ніколі не адварочвацца ад Расіі”
9 кастрычніка, Позірк. Прэзідэнт РФ Уладзімір Пуцін уручыў 9 кастрычніка Аляксандру Лукашэнку ордэн Святога апостала Андрэя Першазванага, гэта адбылося падчас візіту апошняга ў Маскву, паведамляюць расійскія СМІ.
Адзначаецца, што Пуцін пажадаў “роднаму беларускаму народу” “міру, стабільнасці і росквіту”. Лукашэнка ў сваю чаргу заявіў, што “заўсёды будзе стаяць на варце агульных інтарэсаў Расіі і Беларусі”.
“Беларусь ніколі не адварочвалася ад Расіі, хоць яе шмат разоў ставілі перад выбарам”, — сказаў ён.
Лукашэнка таксама заявіў, што разглядае ўзнагароду “як прызнанне заслуг усяго беларускага народа, які паслядоўна ўмацоўвае адзінства з брацкай Расіяй”. “Для нашай краіны Расія заўсёды была і будзе больш, чым суседняя дзяржава”, — дадаў ён.
Паводле слоў ардэнаносца, “беларусы, украінцы, расіяне, растуць ад аднаго кораня”, таму Расія і Беларусь цяпер разам вядуць “барацьбу за справядлівы свет”, стаяць “у авангардзе гэтай жорсткай і вельмі сур’ёзнай барацьбы”.
Ордэнам Святога апостала Андрэя Першазванага ўзнагароджваюцца “вядомыя дзяржаўныя і грамадскія дзеячы, ваеначальнікі, выбітныя прадстаўнікі навукі, культуры, мастацтва і розных галін эканомікі за выключныя заслугі, якія спрыяюць росквіту, велічы і славе Расіі, забеспячэнню яе нацыянальнай бяспекі і суверэнітэту”. Могуць быць узнагароджаныя “за выдатныя заслугі перад Расійскай Федэрацыяй кіраўнікі замежных дзяржаў”. Ордэн Святога апостала Андрэя Першазванага мае знак і зорку.
Аб узнагароджанні Лукашэнкі ордэнам стала вядома 30 жніўня. У адпаведным указе Пуціна гаварылася, што ўзнагарода прызначаная “за выдатныя заслугі ў развіцці адносін саюзніцтва і стратэгічнага партнёрства паміж Расійскай Федэрацыяй і Рэспублікай Беларусь, умацаванні дружалюбных сувязяў паміж расійскім і беларускім народамі, а таксама за вялікі асабісты ўклад у стварэнне і эфектыўную дзейнасць Саюзнай дзяржавы”. У дакуменце Лукашэнка названы “прэзідэнтам Рэспублікі Беларусія”.
Пуцін пасля выбараў 2020 года, вынікі якіх не прызнала сусветная супольнасць, стаў практычна адзіным саюзнікам Лукашэнкі. Апошні пасля падаўлення пратэстаў і жорсткіх рэпрэсій, якія працягваюцца ўжо чатыры гады, у сваю чаргу стаў саўдзельнікам расійскай агрэсіўнай вайны супраць Украіны, прадаставіўшы Расіі для нападу тэрыторыю Беларусі. Абодва знаходзяцца пад шматлікімі санкцыямі.
Цяперашняя сустрэча Лукашэнкі і Пуціна стала восьмай з пачатку года.