У верасні МАЗ прадаў на рынку РФ на 41,2% менш новых грузавікоў, чым годам раней

12 кастрычніка, Позірк. У верасні на расійскім рынку было прададзена 336 новых грузавікоў Мінскага аўтамабільнага завода — на 41,2% менш, чым у тым жа месяцы 2023 года (572), гаворыцца ў даследаванні “АСМ-холдынг” (РФ).

За дзевяць месяцаў беларускае прадпрыемства рэалізавала 4.095 адзінак гэтай тэхнікі (за адпаведны леташні перыяд — 4.692; -12,7%).

Прадукцыя Мінскага аўтазавода ў мінулым месяцы заняла 10-е месца (у жніўні — 8-е) у спісе самых прадаваных брэндаў гэтага сегмента аўтарынку Расіі, канстатавалі эксперты. Доля на рынку склала 3,9% (4,2%).

Пяцёрка лідараў продажаў: SITRAK (1.650; -25,5% да ўзроўню продажаў у жніўні 2023-га), КамАЗ (1.689; -43,3%), Shaanxi (1.474; -32%), Dongfeng (1.279; рост у 2,3 раза), FAW (854; -59,9%).

У 2023 годзе МАЗ прадаў 6.406 новых грузавікоў — на 45,9% больш, чым у 2022-м (4.391).

На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як у цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.

Лукашэнка таксама адзначыў, што пры рэалізацыі ў РФ па схеме “вытворца — генеральны імпарцёр — дыстрыбутар — дылер — канчатковы спажывец” кошт грузавой і пасажырскай тэхнікі МАЗа ўзрастае — на 20%.

15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці адмысловых ахоўных захадаў праз актыўную экспансію кітайскіх вытворцаў”.

“Гаворка не проста пра падвышэнне імпартных пошлін, тут поля для манеўру амаль няма. Я маю на ўвазе антыдэмпінгавыя і спецабаронныя захады”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі відавочная, а дынаміка іх продажаў палохае.