Наўседа заклікаў Еўракамісію даць Літве інструменты для барацьбы з нелегальнай міграцыяй

17 кастрычніка, Позірк. Літва сутыкаецца са спецыфічным выклікам, звязаным з гібрыднымі атакамі з боку Беларусі, інструменталізацыяй нелегальнай міграцыі, заявіў перад адкрыццём саміту ЕС 17 кастрычніка ў Бруселі прэзідэнт гэтай балтыйскай дзяржавы Гітанас Наўседа.

Паводле яго слоў, сітуацыя на мяжы з Беларуссю зараз “больш-менш стабільная, але заўтра яна можа змяніцца”.

“Праз гэты спецыфічны від міграцыі мы просім Еўрапейскую камісію змяніць прававыя рамкі, узяць да ўвагі сітуацыю і даць нам інструменты, каб паспрабаваць стабілізаваць сітуацыю і мець магчымасць супраціўляцца, таму што гаворка ідзе пра нашу жыццеўстойлівасць і магчымасць стабілізаваць знешнюю мяжу ЕС”, — заявіў палітык.

Саміт ЕС праходзіць 17–18 кастрычніка. Адным з пытанняў яго парадку дня з’яўляецца міграцыя. У рамках яго разгляду еўрапейскія лідары абмяркуюць у тым ліку ўзмацненне кантролю над знешнімі межамі ЕС, меры па барацьбе з інструменталізацыяй мігрантаў, гандлем людзьмі і кантрабандай.

Ад пачатку кастрычніка суседнія краіны Еўрасаюза прадухілілі звыш 1,2 тыс. спробаў нелегалаў трапіць з тэрыторыі Беларусі (Літва — 89), ад пачатку года — больш за 33 тыс. (712).

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Падрабязнасці даступныя падпісчыкам “Позірк+”