Ціханоўская назвала атаку на беларускі цэнтр у Вільнюсе чарговай правакацыяй рэжыму Лукашэнкі

26 кастрычніка, Позірк. “Чарговай падстроенай рэжымам у Мінску правакацыяй” назвала дэмакратычны лідар Святлана Ціханоўская напад на Цэнтр беларускай супольнасці і культуры ў Вільнюсе.

“[Аляксандр] Лукашэнка і [прэзідэнт РФ Уладзімір] Пуцін адчайна спрабуюць падзяліць літоўцаў і беларусаў, але наша адзінства мацнейшае за іх страх”, — напісала палітык на сваёй старонцы ў сацыяльнай сетцы Х.

Раніцай 26 кастрычніка супрацоўнікі згаданага цэнтра знайшлі сляды агню на ўваходных дзвярах у будынак, дзе апрача гэтай арганізацыі месціцца Беларускі музей імя Івана Луцкевіча.

На сцяне будынка нехта таксама пакінуў надпіс “Dink iš Lietuvos” (“Вымятайся з Літвы”), а таксама сапсаваў мурал з “дыджэямі перамен” (выява Кірыла Галанава і Улада Сакалоўскага, што ўключылі кампазіцыю “Перамен” Віктара Цоя 6 жніўня 2020 года ў Кіеўскім скве Мінска на “дзіцячым свяце”, якое ўлады зладзілі, каб не даць магчымасці сабрацца праціўнікам Аляксандра Лукашэнкі).

У ноч на 4 верасня невядомыя разбілі шкло Цэнтра беларускай супольнасці і культуры. Тады ж нехта абстраляў з пнеўматычнай зброі памяшканне, дзе праводзіць службы беларускі прыход Канстанцінопальскага патрыярхата ў Вільнюсе, у акне засталася адтуліна.

У ноч на 28 ліпеня на будынку беларускай крамы сувеніраў “Кропка” ў Вільнюсе невядомыя пакінулі надпіс на літоўскай мове “Вяртайцеся дадому, беларускія свінні” і разбілі акно.

Дэмакратычныя сілы Беларусі лічаць гэтыя інцыдэнты правакацыяй з боку рэжыму Аляксандра Лукашэнкі.