Жыхар Мінскага раёна прыгавораны да пазбаўлення волі за “адмаўленне генацыду беларускага народа”
5 лістапада, Позірк. Мінскігарадскі суд прыгаварыў да трох гадоў пазбаўлення волі 55-гадовага жыхара Мінскага раёна Андрэя Савіцкага, тынкоўшчыка па прафесіі, паведамляе дзяржвыданне “СБ. Беларусь сёння”.
Мужчына прызнаны вінаватым паводле ч. 1 арт.1302 (адмаўленне генацыду беларускага народа, якое палягае ў публічным выступе, альбо ў друкаваным ці публічна дэманстраваным творы, альбо ў СМІ, альбо ў інфармацыі, размешчанай у <…> інтэрнэце) і ч. 1 арт. 368 (абраза прэзідэнта) Крымінальнага кодэкса.
Сцвярджаецца, што справа была распачатая за публікацыі ў сацсетцы “Аднакласнікі” з крытыкай Аляксандра Лукашэнкі і заявамі аб “недатычнасці да знішчэння людзей [у Хатыні] вайскоўцаў 118-га батальёна ахоўнай паліцыі і асаблівага батальёна СС Дырлевангера”.
Адзначаецца, што Савіцкага затрымалі ў лютым гэтага года.
3 сакавіка паведамлялася аб затрыманні супрацоўнікамі МУС у рамках крымінальнай справы 54-гадовага мінчука.
“Устаноўлена: мужчына ў 2020 годзе стварыў і адміністраваў групу ў сацыяльнай сетцы, дзе размяшчаў дэструктыўныя матэрыялы пратэстнай тэматыкі, накіраваныя на змену канстытуцыйнага ладу, — паведамляла прэс-служба МУС. — Разам з гэтым у сваіх публікацыях фігурант адмаўляў генацыд беларускага народа з боку нямецкіх захопнікаў падчас Вялікай Айчыннай вайны, рэабілітуючы фашыстаў і прыпісваючы савецкім грамадзянам злачынствы, учыненыя акупантамі”.
“Падобнымі пастамі”, сцвярджала ведамства, затрыманы “спрабаваў ачарніць памяць ахвяр нацызму і герояў, якія змагаліся з ворагам”.
Тады заяўлялася аб прад’яўленых абвінавачваннях паводле чатырох артыкулаў КК: арт. 1301 (рэабілітацыя нацызму), ч. 1 арт. 1302, ч. 1 арт. 368, ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
У МУС заявілі, што гэта першы выпадак “прыцягнення да адказнасці” за “адмаўленне генацыду беларускага народа”.
У 2022 годзе Генеральная пракуратура паведаміла аб узбуджэнні справы паводле арт. 1302 КК у дачыненні да “групы неўстаноўленых асоб”, якія на медыя-рэсурсах “Флагшток” і “Люстэрка” “распаўсюджвалі інфармацыю” аб адмаўленні генацыду.
Гэты ж крымінальны артыкул інкрымінаваны журналісту “Радыё Свабода” Сяргею Дубаўцу, які пражывае за мяжой, супраць якога ў студзені была распачатая спецвытворчасць.
Тэму “генацыду беларускага народа” ўлады пачалі актыўна прасоўваць каля трох гадоў таму, тады ж за яго публічнае адмаўленне ўвялі крымінальную адказнасць. Пры гэтым прадстаўнікі рэжыму Лукашэнкі пастаянна праводзяць паралель паміж гітлераўцамі і ўдзельнікамі пратэстаў супраць фальсіфікацыі вынікаў прэзідэнцкіх выбараў 2020 года і гвалту з боку сілавікоў.