20 лістапада, Позірк. У Беларусі яшчэ 13 чалавек прызнана палітвязнямі, цяпер іх 1.275, паведамляе праваабарончы цэнтр”Вясна”.
Статус палітвязняў атрымалі, у прыватнасці, Станіслаў Таспаеў, Уладзімір Парашкоў, Генадзь Горбач, Іна Пальцава, Сяргей Крывуць, Андрэй Астапенка, Андрэй Савіцкі, Артур Канапацкі, Артур Моўчан, Аляксандр Акакіеў, Дзмітрый Альховік і Дзмітрый Суўханаў (паводле звестак ініцыятывы Dissidentby, родны брат Марат Суўханава, які ваяваў ва Украіне на баку расійскіх акупацыйных войскаў і быў забіты ў лютым 2023 года).
Горбач, Крывуць, Савіцкі, Акакіеў, Пальцава, Альховік асуджаныя паводле арт. 368 Крымінальнага кодэкса (абраза прэзідэнта), Канапацкі, Молчан, Парашкоў, Суўханаў — паводле арт. 370 (паклёп у дачыненні да прэзідэнта).
Палітвязнем таксама прызнаны праўладны блогер, вядомы як інтэрнэт-правакатар Яўген Катляроў (псеўданім Яўген Какойта, “Нейкі”), асуджаны да 1,5 года пазбаўлення волі ва ўмовах агульнага рэжыму па арт. 3691 (дыскрэдытацыя Рэспублікі Беларусь) і 369 (абраза прадстаўніка ўлады). Катляроў сярод іншага адзначыўся тым, што сведчыў супраць праваабаронцы Леаніда Судаленкі на палітычна матываваным працэсе, па выніках якога той быў прыгавораны да трох гадоў зняволення, раней ладзіў правакацыі супраць незалежных СМІ.
Праваабаронцы ў чарговы раз запатрабавалі “дэкрыміналізацыі дыфамацыі і недапушчальнасці пазбаўлення волі грамадзян за абразу службовых асоб, дзяржавы, дзяржаўных органаў і здзеку над сімваламі”.
Аўтары заявілі, што пераслед і пазбаўленне волі названых людзей лічаць палітычна матываваным, звязаным з мірнай рэалізацыяй выказвання меркавання, і запатрабавалі іх вызвалення, роўна як і астатніх палітычных зняволеных.
Заяву падпісалі праваабарончы цэнтр “Вясна”, Беларускі Хельсінкскі камітэт, Беларуская асацыяцыя журналістаў, “Прававая ініцыятыва” і Lawtrend.
“Пазірк” накіраваў запыт у “Вясну” для высвятлення прычын унясення Катлярова ў спіс палітвязняў.
