Лукашэнка даў бегламу польскаму экс-суддзі Шмыдту палітычны прытулак (дапоўнена)
23 лістапада, Позірк. Аляксандр Лукашэнка даў бегламу польскаму экс-суддзі Томашу Шмыдту палітычны прытулак у Беларусі, паведамляе яго прэс-служба.
Акрамя гэтага ён прыняў у грамадзянства 257 чалавек (з іх 15 непаўналетніх). Беларускі пашпарт атрымалі “асобы, якія прыбылі з 16 дзяржаў — гэта Украіна, Расія, Малдова, Казахстан, Арменія, Узбекістан, Туркменістан, Грузія, Сірыя, Палестына і інш.”.
Пасля расійскага ваеннага ўварвання ва Украіну 24 лютага 2022 года ў Беларусь рэгулярна ўцякаюць з дэмакратычных краін прыхільнікі Расіі і Лукашэнкі.
Адзін з самых вядомых перабежчыкаў — былы польскі суддзя Томаш Шмыдт. У траўні ён прыбыў у Беларусь і заявіў хадайніцтва аб атрыманні палітычнага прытулку. Неўзабаве быў працаўладкаваны ў дзяржаўнае інфармагенцтва БелТА. У Польшчы ў адносінах да яго вядзецца расследаванне.
На сёння Шмыдт, які прадстаўляецца беларускімі дзяржСМІ як “дысідэнт”, актыўна ўдзельнічае ў праўладнай прапагандзе, узначальвае фонд “Польская праўда”.
10 кастрычніка стала вядома, што мазавецкі ваявода на падставе запыту Нацыянальнай пракуратуры Польшчы ануляваў пашпарт Шмыдта.
Адзначаецца, што гэты крок “не набліжае затрыманне Шмыдта, але істотна абмяжоўвае яго магчымасць падарожнічаць”. Польскія медыі мяркуюць, што калі перабежчык “не атрымае пашпарт, напрыклад, ад беларускіх уладаў”, то ў Беларусі “ён апынецца ў пастцы”, “зможа ездзіць толькі ў Расію, якая супрацоўнічае з рэжымам Лукашэнкі”.
Расследаванне справы аб магчымым супрацоўніцтве Шмыдта з беларускімі спецслужбамі працягваецца.
Пра тое, што суддзя 2-га аддзялення Ваяводскага адміністрацыйнага суда Варшавы Томаш Шмыдт уцёк у Беларусь, стала вядома 6 траўня з паведамлення тэлеграм-канала, створанага трыма днямі раней ад яго імя на польскай і рускай мовах. У ім сцвярджалася, што мужчына вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “падвяргаўся пераследам і пагрозам за самастойную палітычную пазіцыю”.
Прэм’ер-міністр Польшчы Дональд Туск заявіў 7 траўня, што спецслужбы Беларусі даўно працавалі са Шмытам, яго адносіны з беларусамі “маюць даўнюю гісторыю”, гэта не справа “апошніх месяцаў”.
9 траўня Шмыдт быў звольнены Вышэйшым адміністрацыйным судом на падставе яго заявы. Нацыянальная пракуратура Польшчы пачала расследаванне.
4 чэрвеня стала вядома, што Шмыдт не будзе ўключаны ў спіс асоб, якія адшукваюцца Інтэрполам з “чырвоным апавяшчэннем”. Паводле інфармацыі прэс-сакратара Галоўнага ўпраўлення паліцыі Польшчы Катажыны Новак, гэта звязана з тым, што Інтэрпол “не дазваляе перадаваць па сваіх каналах дадзеныя наконт дзеянняў супраць бяспекі дзяржавы, якія вызначаюцца як палітычныя злачынствы”. Да такіх дзеянняў, адзначыла Новак, Інтэрпол адносіць шпіянаж.
10 чэрвеня акруговы суд Варшавы выдаў ордэр на арышт Шмыдта. Ордэр мае сілу толькі на тэрыторыі дзяржаў, якія ўваходзяць у Еўрасаюз, гэта значыць не будзе мець рэальнай сілы, пакуль перабежчык не перасячэ мяжу адной з краін ЕС.