27 лістапада, Позірк. Аляксандр Лукашэнка падчас візіту ў Пакістан сустрэўся з сям’ёй Шарыф. У сустрэчы ўзяў удзел брат прэм’ер-міністра Шахбаза Шарыфа, які нядаўна вярнуўся з выгнання, Наваз Шарыф.
Як паведамляе прэс-служба Лукашэнкі, у закрытым рэжыме прайшлі перамовы з начальнікам штаба сухапутных войскаў Узброеных сіл Пакістана (камандуючым арміяй Пакістана) генералам Асімам Мунірам.
На перамовах з Шахбазам Шарыфам 26 лістапада ў Ісламабадзе Лукашэнка заявіў аб магчымасці ўвядзення паміж краінамі бязвізавага рэжыму.
Наваз Шарыф, будучы на пасадзе прэм’ера Пакістана, наведваў Мінск у 2015 годзе. Лукашэнка, вітаючы пакістанскага прэм’ера, сказаў тады, што Шарыф — той палітык, які “можа быць прыкладам для любога палітыка ў свеце”, для яго ў тым ліку.
У 2017 годзе Наваз Шарыф быў адхілены ад пасады Вярхоўным судом Пакістана па выніках антыкарупцыйнага расследавання. Ён збег у Лондан, аднак вярнуўся на радзіму ў 2018 годзе, дзе быў арыштаваны. У 2019 годзе быў адпушчаны пад заклад і выключаны са спісу асоб, якім забаронены выезд з краіны, чым скарыстаўся, каб зноў паляцець у сталіцу Вялікабрытаніі.
У кастрычніку 2023 года Наваз Шарыф вярнуўся ў Пакістан пасля чатырохгадовага добраахвотнага выгнання.
Адначасова з візітам Лукашэнкі ў Пакістан у краіне, у тым ліку ў сталіцы Ісламабадзе, выбухнулі пратэсты прыхільнікаў былога прэм’ер-міністра Імрана Хана, які знаходзіцца ў зняволенні з траўня 2023 года. Яны выйшлі на вуліцы буйных гарадоў, заклікаючы адпусціць Хана і правесці датэрміновыя выбары. Яны таксама планавалі правесці сядзячую забастоўку каля будынка парламента, аднак сілавікі пачалі аперацыю па зачыстцы Ісламабада ад пратэстоўцаў, паведаміла амерыканская тэлекампанія CNN.
“Вас будуць гайдаць, у вас будуць пастаянна нагнятаць абстаноўку”, — заявіў Лукашэнка ў Пакістане.
Аўтарызавацца
Забыліся пароль?
Выхад з профілю
