Праект “Маланка медыя” просіць дапамогі для аднаўлення працы сайта
29 лістапада, Позірк. Праект “Маланка медыя” просіць фінансавай дапамогі для аднаўлення працы свайго сайта. Збор сродкаў абвешчаны на платформе фонду салідарнасці BySol.
“Маланка” сутыкнулася з новым выклікам: недахопам фінансавання. Ключавы донар перастаў нас падтрымліваць без тлумачэння прычын. Мы шукалі выхады з гэтай сітуацыі, але ва ўмовах вымушанай эміграцыі варыянтаў не так шмат”, — гаворыцца ў паведамленні на сайце фонду.
Сума збору — 20 тыс. еўра. Паведамляецца, што гэтыя грошы дазволяць “утрымліваць сайт цягам пяці месяцаў і выплачваць заробкі чатыром супрацоўнікам”. Рэдакцыя спадзяецца, што пасля гэтага донарскае фінансаванне будзе адноўлена.
Сайт malanka.media не абнаўляецца з 15 лістапада. З 14 лістапада не публікуюцца матэрыялы ў тэлеграм-канале. Ютуб-канал і іншыя сацыяльныя сеткі выдання працягваюць працу.
У дачыненні да кіраўніка праекта “Маланка медыя” і заснавальніка платформы Zubr Паўла Марыніча ў Беларусі была ўзбуджаная спецвытворчасць, 18 сакавіка ён быў завочна прыгавораны да чатырох гадоў пазбаўлення волі паводле ч. 2 арт. 191 Крымінальнага кодэкса (перашкода працы Цэнтральнай выбарчай камісіі, а таксама камісій па рэферэндуме, здзейсненае з ужываннем пагрозы і іншым спосабам, групай асоб па папярэдняй змове).
З пачатку 2024 года з фінансавымі праблемамі сутыкнуліся многія незалежныя СМІ, у тым ліку KYKY, Reform, “Белсат”, Plan B, беларуская рэдакцыя польскага “Радыё Ўнэт”, якая ў выніку спыніла працу, EX-PRESS.
28 лістапада аб падтрымцы папрасіла рэдакцыя медыя “Новы час”.
