ЕС выдзеліць 30 млн еўра для падтрымкі беларускага дэмакратычнага руху

12 снежня, Позірк. У Еўрапейскім саюзе ведаюць “розніцу паміж беларускім народам і рэжымам, які кіруе краінай”, заявіла камісар ЕС па пытаннях пашырэння Марта Кос на канферэнцыі высокага ўзроўню “Разам з народам Беларусі”, якая праходзіць 12 снежня ў будынку Еўрапарламента ў Брусэлі.

Паводле слоў Кос, у ЕС “спынілі ўзаемадзеянне з беларускімі органамі ўлады і дзяржаўнымі прадпрыемствамі, а для аказання ціску на рэжым былі ўведзеныя санкцыі”.

“У той жа час, — адзначыла камісар, — мы ўзмацнілі нашу падтрымку беларускіх дэмакратычных сіл і грамадзянскай супольнасці. Сёння я рада аб’явіць аб новым пакеце дапамогі для народа Беларусі на суму 30 млн еўра. Ён дапаможа падтрымаць незалежныя галасы, абараніць праваабаронцаў і аказаць дапамогу культуры і адукацыі ў выгнанні”.

Кос паведаміла, што агульная сума падтрымкі ЕС з 2020 года складзе 170 млн еўра. “Гэта — канкрэтнае выказванне нашай салідарнасці. Яна дапамагла, напрыклад, аказаць юрыдычную і медыцынскую падтрымку больш чым 3.000 ахвяр рэпрэсій, даць стыпендыі больш чым 3.000 студэнтам і падтрымаць тысячы бізнесаў у выгнанні”, — падкрэсліла яна.

“На працягу ўсёй гісторыі Еўропы мы бачылі, як дух свабоды перамагаў насуперак усім нягодам. Сёння той жа дух жыве ў мужнасці беларускага народа, стойкасці вашых суполак у выгнанні і творчасці вашых мастакоў”, — сказала камісар.

“Я хачу, каб вы ведалі, што Еўрапейскі саюз будзе побач з вамі ў вашым імкненні да свабоднай, дэмакратычнай, суверэннай і незалежнай Беларусі як часткі мірнай і квітнеючай Еўропы”, — заявіла Кос, звяртаючыся да прысутных у зале беларусаў.

Канферэнцыя высокага ўзроўню “Разам з народам Беларусі” з’яўляецца адным з мерапрыемстваў Дзён Беларусі, якія праходзяць на гэтым тыдні ў Брусэлі.