Беларус учыніў п’яны скандал у прысутнасці сваіх дзяцей на Пхукет, абвінавачваецца ў нападзе на паліцэйскіх

12 снежня, Позірк. 39-гадовы беларус абвінавачваецца ў нападзе на паліцэйскіх ноччу 11 снежня на тайландскім востраве Пхукет, паведамляе газета Bangkok Post.

У публікацыі ён названы Siarhei Asychuk. Адзначаецца, што ён быў у нецвярозым стане і ўчыніў дэбош у прысутнасці трох сваіх дзяцей.

Каля 3:10 паліцыя прыбыла на тэрыторыю перад гатэлем недалёка ад пляжу Карон, дзе мужчына ў ніжняй бялізне ствараў праблемы навакольным.

На апублікаваным відэазапісе ён бегае, крычыць, б’ецца з паліцыяй і ахоўнікамі, якія спрабуюць яго злавіць. Дзеці дэбашыра плачуць, просяць супакоіцца, а сваю маці — адысці ад яго. Жанчына яго спрабуе уціхамірыць, затым здымае затрыманне на камеру мабільнага тэлефона.

Грамадзянін затрыманы, яму прад’яўленыя абвінавачванні ў парушэнні грамадскага парадку і нападзе на супрацоўнікаў паліцыі.

Паводле звестак выдання, жонка і дзеці наведалі яго ў аддзяленні паліцыі і адправіліся дадому згодна з набытымі квіткамі.

12 снежня павінен быў адбыцца суд, вынік пакуль невядомы.