На сустрэчы з Мадурам віцэ-прэм’ер Каранкевіч заявіў пра гатоўнасць разам з Венесуэлай “пераадольваць усе санкцыйныя бар’еры”

12 студзеня, Позірк. Пра гатоўнасць сумесна з Венесуэлай “пераадольваць усе санкцыйныя бар’еры і перашкоды” заявіў на сустрэчы з прэзідэнтам гэтай лацінаамерыканскай краіны Нікаласам Мадурам намеснік прэм’ер-міністра Віктар Каранкевіч.

Як паведамляе прэс-служба ўрада, “беларускі бок у чарговы раз павіншаваў Мадуру з перамогай на выбарах і ўступленнем на пасаду прэзідэнта краіны”, “перададзеныя цёплыя словы прывітання і віншаванні” ад Аляксандра Лукашэнкі.

“Выказваем упэўненасць, што пад вашым кіраўніцтвам краіна будзе рухацца да яшчэ большага ўмацавання незалежнасці дзяржавы”, — сказаў Каранкевіч.

Паводле слоў Мадуры, Венесуэла “застаецца верным саюзнікам і сябрам Беларусі”.

Адзначаецца, што венесуэльскі прэзідэнт “пацвердзіў гатоўнасць наведаць Беларусь у бягучым годзе”.

Інаўгурацыя Мадуры прайшла ў Каракасе 10 студзеня.

28 ліпеня 2024 года ў Венесуэле адбыліся прэзідэнцкія выбары, пераможцам якіх у трэці раз абвясцілі Мадуру. Паводле афіцыйнай інфармацыі, ён набраў 51,2% галасоў, нязначна апярэдзіўшы кандыдата аб’яднанай апазіцыі — былога дыпламата Эдмунда Гансалеса (44,2%). Паводле даных незалежных экзітполаў, Гансалеса падтрымала 65% выбаршчыкаў, а Мадуру — ад 14% да 31%.

Пасля выбараў у Венесуэле пачаліся пратэсты апазіцыі. Паводле інфармацыі мясцовых СМІ, у Каракасе паліцыя і вайскоўцы ўжывалі супраць пратэстоўцаў слёзатачывы газ і гумовыя кулі. Пратэсты былі канчаткова падаўленыя ў пачатку жніўня.

Загінула прынамсі 28 чалавек, каля 200 былі параненыя. Улады арыштавалі каля 2.000 чалавек, з’явіліся паведамленні, што некаторыя падвергліся катаванням.

У сярэдзіне лістапада ўлады абвясцілі аб вызваленні 225 чалавек, затрыманых падчас пратэстаў.

Дэмакратычныя краіны не прызналі вынікі выбараў.

Мадура кіруе ў Венесуэле з 2013 года. Супраць Венесуэлы ўведзены шэраг міжнародных санкцый.