Ціханоўская дамовілася з былым прэм’ер-міністрам Фінляндыі правесці кампанію падтрымкі жанчын-палітвязняў

24 студзеня, Позірк. Правесці кампанію падтрымкі жанчын-палітвязняў, каб прыцягнуць да іх увагу міжнароднай супольнасці, дамовіліся дэмакратычны лідар Святлана Ціханоўская і былы прэм’ер-міністр Фінляндыі Санна Марын, паведамляе прэс-служба беларускага палітыка.

Таксама плануецца арганізаваць супольнае мерапрыемства па Беларусі разам з Цэнтрам Тоні Блэра (былы прэм’ер-міністр Вялікабрытаніі), дзе цяпер працуе Марын.

Бакі абмеркавалі магчымыя шляхі вызвалення палітвязняў і неабходнасць прыцягнення ўвагі сусветных лідараў і СМІ да Беларусі.

Прэс-служба Ціханоўскай адзначае, што Марын выказала салідарнасць з беларускім народам і падтрымку дэмакратычным пераменам у Беларусі.

Ціханоўская сустракалася з Марын тройчы: у сакавіку 2021 года і снежні 2022-га падчас візітаў у Фінляндыю, а таксама ў снежні 2021 года на саміце Усходняга партнёрства ў Бруселі.

У снежні 2022 года на сустрэчы з Марын Ціханоўская заклікала не зачыняць дзверы для беларусаў, якія шукаюць прытулак у Еўрасаюзе.

Калі Марын сыходзіла ў адстаўку ў красавіку 2023 года, Ціханоўская выказала ёй падзяку за “непахісную падтрымку свабоднай і дэмакратычнай Беларусі”.

Ціханоўская адзначыла, што Марын заўсёды натхняла яе “сваім моцным лідарствам, мужнасцю і рашучасцю”, і выказала надзею на “працяг цеснага супрацоўніцтва з Фінляндыяй”, пажадаўшы Марын усяго найлепшага ў “будучых пачынаннях”. Тая падзякавала ў адказ. Інфармацыю пра апошнія перамовы з Ціханоўскай яна перапосціла на сваю старонку ў “Х” (былы “Твітар”).

Санна Марын пасля паражэння яе Сацыял-дэмакратычнай партыі на парламенцкіх выбарах падала прашэнне аб адстаўцы. Яна ўзначальвала кабінет з канца 2019 года.