Стаўкі ўтылізацыйнага збору ў Беларусі прыраўненыя да расійскіх

29 студзеня, Позірк. Урад пераразлічыў стаўкі ўтылізацыйнага збору і зрабіў іх “выраўніванне” са стаўкамі, якія дзейнічаюць у Расіі з 1 студзеня 2025 года, паведамляе прэс-служба Савета міністраў Беларусі. Адпаведную пастанову падпісаў прэм’ер-міністр Раман Галоўчанка.

Прадугледжаны пераразлік ставак утылізацыйнага збору, што выплачваецца як фізічнымі, так і юрыдычнымі асобамі на транспартныя сродкі, што вырабляюцца і ўвозяцца ў Беларусь, самаходныя машыны і (ці) прычэпы да іх, за выключэннем выпадкаў, прадугледжаных міжнароднымі дамовамі.

Таксама “ўдакладнены парадак узгаднення набыцця транспартных сродкаў”.

Дакумент пачынае дзейнічаць праз 10 дзён пасля яго афіцыйнага апублікавання.

23 снежня мінулага года на нарадзе па пытаннях развіцця машынабудавання Аляксандр Лукашэнка паведаміў, што дамовіўся з РФ па пытанні ўтылізацыйнага збору, якое абмяркоўваў падчас сустрэчы з Уладзімірам Пуціным падчас візіту ў краіну ў ліпені мінулага года.