7 лютага, Позірк. У аўтаномнай супольнасці Каталонія (Іспанія) 6 лютага па падазрэнні ў тэрарызме быў затрыманы грамадзянін Беларусі, паведамляе выданне El Periódico.
Мужчына быў затрыманы ў складзе групы маладых людзей (усім каля 20 гадоў) — грамадзян Расіі, Калумбіі і Іспаніі. Адзначаецца, што яны пражывалі ў Барселоне.
У публікацыі гаворыцца, што падазраваныя праводзілі “акцыі” ў розных краінах Еўропы, а іх дзеянні “былі скіраваныя супраць падтрымкі Украіны ўрадамі і асацыяцыямі ў яе вайне супраць расійскага ўварвання”.
Паводле звестак паліцыі, дзеянні групы каардынаваліся “расійскім штабам”.
Пракуратура Іспаніі прад’явіла затрыманым абвінавачанні ў тэрарызме і “членстве ў злачыннай арганізацыі”.
Міністэрства замежных спраў Беларусі не паведамляла пра затрыманне суайчынніка.
