У рамках праверкі баявой гатоўнасці ў вайсковыя часткі дастаўляюць аўтамабілі “прадпрыемстваў народнай гаспадаркі”
11 лютага, Позірк. У рамках праверкі баявой гатоўнасці Узброеных сіл “на пункт прыёму асабовага складу працягваюць прыбываць ваеннаабавязаныя для ўкамплектавання правяраемых вайсковых частак”, паведамляе Міністэрства абароны.
“Пасля праходжання дэталёвага медыцынскага агляду да прыбываючага асабовага складу даводзяць неабходную інфармацыю аб парадку іх удзелу ў зборавых мерапрыемствах, пасля чаго ваеннаабавязаныя атрымліваюць маёмасць і адпраўляюцца ў прызначаныя падраздзяленні”, — адзначае ведамства.
Паведамляецца таксама, што ў вайсковых частках “пачаты прыём аўтамабільнай тэхнікі, якая паступае з прадпрыемстваў народнай гаспадаркі”. “Ваеннаслужачыя праводзяць дэталёвы тэхнічны агляд і размяркоўваюць тэхніку ў падраздзяленні паводле прызначэння”, — удакладняецца ў паведамленні.
“На пункце прыёму асабовага складу ў першую чаргу арганізавана інфармацыйна-тлумачальная праца, каб давесці да кожнага ваеннаабавязанага яго правы, гарантыі, ільготы, якія прадугледжаны заканадаўствам Рэспублікі Беларусь і нарматыўна-прававымі актамі Міністэрства абароны па пытаннях фінансавага і сацыяльнага забеспячэння на час праходжання збораў”, — цытуе Мінбароны начальніка фінансава-эканамічнага аддзела — памочніка начальніка з’яднання па фінансавым забеспячэнні Дзмітрыя Кісялёва.
Падкрэсліваецца, што ў перыяд удзелу ў праверцы за ваеннаабавязаным “захоўваецца месца працы і сярэдні заробак”, акрамя таго, ім “выплачваецца грашовае забеспячэнне <…> у безнаяўным парадку”.
3 лютага прэс-служба Мінбароны Беларусі паведаміла пра пачатак праверкі баявой гатоўнасці ва Узброеных сілах.
Ведамства папярэдзіла, што на час праверкі “запланаваны рух ваеннай тэхнікі”, таму “магчыма часовае абмежаванне руху грамадзянскага транспарту па дарогах агульнага карыстання і асобных участках мясцовасці”.
Міністр абароны Віктар Хрэнін у сувязі з пачаткам праверкі баявой гатоўнасці заявіў, што “бягучая абстаноўка” абавязвае вайскоўцаў “трымаць руку на пульсе і трымаць порах сухім, быць гатовымі да таго, для чаго прызначаны Узброеныя сілы, і пры неабходнасці — забяспечыць абарону суверэнітэту і тэрытарыяльнай цэласнасці Рэспублікі Беларусь”.
4 лютага стала вядома, што беларускі бок у добраахвотным парадку паведаміў пра раптоўную праверку баявой гатоўнасці ва Узброеных сілах удзельнікам Венскага дакумента 2011 года аб мерах умацавання даверу і бяспекі.
“Паведамленыя мэты, тэрміны, колькасць удзельнікаў праверкі, а таксама іншая інфармацыя, накіраваная на забеспячэнне адкрытасці ваеннай дзейнасці на прасторы Арганізацыі па бяспецы і супрацоўніцтве ў Еўропе”, — адзначыла Мінбароны.
Рэжым Аляксандра Лукашэнкі бесперапынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
У лютым 2022 года ўварванне ажыццяўлялася ў тым ліку з тэрыторыі Беларусі.