Грузавік з цялятамі перакуліўся ў Чашніцкім раёне
15 ліпеня, Позірк. Пра дарожна-транспартнае здарэнне паблізу вёскі Стараселле Чашніцкага раёна (Віцебская вобласць) паведамляе Міністэрства па надзвычайных сітуацыях.
Пасля атрымання інфармацыі пра ДТЗ, супрацоўнікі ведамства адправіліся да месца здарэння.
Па прыбыцці, як адзначаецца, яны выявілі цялят “усярэдзіне перакуленага ў кювет грузавога аўтамабіля”.
“Работнікі МНС адкрылі кузаў грузавіка і дапамаглі дастаць жывёл”, — гаворыцца ў паведамленні.
Кіроўца і пасажыр транспартнага сродку не пацярпелі, адзначае МНС. Аб пацярпелых жывёлах не паведамляецца.
